Астана тұрғыны әлеуметтік желіде автобус жүргізушісі баланы арбамен есікке қысып қалғанын хабарлады. Әйелдің айтуынша, арба жерге құлаған, деп хабарлайды infohub.kz.
dina_ospanova28 есімімен тіркелген қолданушы Threads әлеуметтік желісінде Астанадағы №54 автобустың жүргізушісіне қатысты оқиғаны баяндады. "Бүгін, 2026 жылғы 2 қыркүйекте, шамамен сағат 08:00-де мен баламмен автобусқа отырмақ болдым. Арбаны көтеріп кіргізбек кезде, жолаушылар көмектесті. Сол сәтте жүргізуші есікті жаба бастады, бірақ әлі отыру аяқталмаған еді", - деді әйел.
Оның айтуынша, ол және басқа жолаушылар айғайлап, жүргізушіні тоқтатуды өтінген, алайда есік жабыла берген. "Нәтижесінде арбаның алдыңғы дөңгелегі автобус есігіне қысылып қалды. Оған қарамастан, жүргізуші жүре берді. Автобус қозғалғанда дөңгелек есіктен шығып кетіп, арба ішіндегі баламен бірге аударылып, жерге құлады. Содан кейін автобус тоқтамай, әрі қарай жүріп кетті. Бақытымызға орай, бала дене жарақатын алған жоқ, бірақ қатты қорықты", - деп жазды автор.
Астаналық әйел "City Transportation Systems" ЖШС басшылығынан жағдайды тексеріп, кінәліні жауапқа тартуды сұрады. Бұл жарияланымға "CTS" өкілі Оксана Әубәкірова жауап берді. "Мұндай жағдай болғанына өкінеміз. Баланың зардап шекпегеніне үміттенеміз. Тексеріп жатырмыз", - деп жазды ол.