Қазақстанда аутизмді емдеудің күмәнді әдістерін ұсынатын медициналық мекемелерге бақылауды күшейту қажеттігі туралы пікірталас қарқын алуда. «Аутизм Қазақстан» ұлттық қауымдастығы ата-аналарды толық емделуге уәде беріп, адастыратын адал емес клиникаларды жауапкершілікке тартуды талап етті, деп хабарлайды infohub.kz сайты.
Мәлімдемеге Ресейдегі «ПланетаМед» клиникасының басшысы Василий Генераловтың күдікті ұсталуы себеп болды. Онда аутизмі бар балаларға паразиттерге қарсы препараттармен емдеуді ұсынған. Бұл туралы БАҚ-тан білген қазақстандық ата-аналар жағдайға баға беруді сұрап, қауымдастыққа жаппай жүгінді.
Қауымдастықта Қазақстанда осыған ұқсас клиникалар жазасыз жұмыс істеп жатқанын атап өтті. «Қазақстанда да осындай клиникалардың басшыларын көптеген ата-аналарды адастырғаны үшін бақылауға алып, жауапкершілікке тарту керек. Қазір бұл салада Қазақстанда аутизмнен керемет емделуді ұсынатын адал емес клиникалар мен адамдар мүлдем жазасыз ашылып, жұмыс істеп жатыр», — деді ұйымда.
Қауымдастық Денсаулық сақтау министрлігі тарапынан бақылауды күшейтуді және ҚР «Халық денсаулығы және денсаулық сақтау жүйесі туралы» кодексіне тиісті өкілеттіктер бөлігінде өзгерістер енгізуді талап етеді. «Яғни, жүйелі шаралар қажет», — деп атап өтті ұйымда. Қауымдастық өкілдері 2019 жылдан бері осындай шаралардың қабылдануына қол жеткізуге тырысып келеді және бұл жұмысты жалғастыруға ниетті.
Еске салайық, 15 тамызда Мәскеу соты «ПланетаМед» директоры Василий Генераловты қамауға алды, ал іс бойынша тағы бір дәрігер үйқамаққа жіберілді. Шешім пациенттердің ата-аналарының көптеген шағымдарынан кейін қабылданды. Ресейлік «Медвестниктің» дерегінше, клиникада аутизмді клизма, антипаразиттік курс, гормондар және дің жасушалары арқылы емдеуге уәде берген. Ата-аналардың айтуынша, мұндай терапиядан кейін балалардың жағдайы нашарлаған, ал емдеу құны миллиондаған рубльді құраған.
Алдыңғы күні медициналық мекемеде тінту жүргізілді. Ресейлік БАҚ тергеу пациенттерге медициналық көмек көрсету мән-жайларын және олардың денсаулығына ықтимал зиянды анықтап жатқанын хабарлады. Ren-TV хабарлағандай, алдын ала деректер бойынша зардап шеккендердің саны 500 адамнан асуы мүмкін. Пациенттердің ата-аналары клиниканың жұмысына және онда қолданылатын әдістерге бірнеше рет шағымданған. Енді тергеу зардап шеккендердің шеңберін, болған оқиғаның мән-жайларын және ықтимал залал мөлшерін анықтауы керек.
Айта кету керек, аутизмнен дәлелденген «ем» жоқ. Бұған дейін «Курсив» Қазақстаннан аутизмі бар баланың Ташкентте күмәнді емделуден кейін қайтыс болғанын жазған. Осыдан кейін «Аутизм Қазақстан» қауымдастығы ата-аналарға жүгініп, неврологтар, нутрициологтар, массажистер, остеопаттар, интегративті медицина дәрігерлері, психологтар және басқа да мамандар аутизмді емдей алмайтынын еске салды. Диагнозды тек балалар психиатры қояды, ал әлемде бұл жағдайдан әлі дәрі жоқ. Дәлелдемелік базасы жоқ барлық «емдеу хаттамалары» баланың денсаулығы мен өміріне төнетін қауіп.
Ал алдыңғы күні ҚР санитарлық-эпидемиологиялық бақылау комитеті ДДҰ-ның соңғы 15 жылдағы шолуының нәтижелерімен бөлісіп, вакциналар мен тиомерсал балаларда аутизм спектрінің бұзылу қаупін арттырмайтынын мәлімдеді.