Қазақстанда 500-ден астам дәрілік заттың құны төмендегені тіркелді. Бұл — дәрі-дәрмек бағасына жүйелі мониторинг жүргізудің нәтижесі, деп хабарлайды infohub.kz сайты.
Атап айтқанда, инфекциялық, жүрек-қан тамырлары ауруларын, сондай-ақ асқазан-ішек жолдарының дерттерін емдеуде кеңінен қолданылатын препараттар арзандады. Тексеру қорытындысы бойынша, 147 атау 20%-дан астамға, 198-і 10–20%-ға, ал тағы 244 дәрі 5–10%-ға қолжетімді болды. Қалған 1267 препараттың бағасы өзгеріссіз қалды.
«Қазір әлеуметтік желілер қарқынды дамыған тұста көптеген дәрілік препараттар жарнамаланып, хабарландырулар арқылы сатылуда, алайда олар тіркелмеген болуы мүмкін. Мұндай фактілерге тап болсаңыз, бізге хабарласыңыз. Заң бойынша әрбір препарат тіркеуден өтуі тиіс. Мемлекеттік баға реттеуіне 3039 рецепт бойынша берілетін дәрілік зат жатады», — деді ҚР Денсаулық сақтау министрлігі Медициналық және фармацевтикалық бақылау комитеті департаментінің басшысы Дәмір Дәулетбаев.
Тұтынушылар препарат құнын өздері де тексере алады. Егер дәріханадағы баға күмән тудырса, оны NAQTY ONIM мобильді қосымшасы арқылы салыстыруға болады. 2024 жылдың 1 шілдесінен кейін шығарылған қаптамаларға арнайы Data Matrix коды басылады. Оны смартфон камерасымен сканерлегенде пайдаланушы өндіруші, тіркеу деректері, таңбалау мәртебесі және тауардың жеткізу тізбегі бойынша қозғалысы туралы ақпарат алады.
«Қосымша тауарларды цифрлық таңбалау мен қадағалаудың мемлекеттік жүйесі аясында әзірленді. Оны қолдану фармацевтикалық нарықтың ашықтығын арттыруға ықпал етеді. Пайдаланушы осы қосымша арқылы препараттың құнын біліп, оны дәріханадағы бағамен салыстыра алады», — деді ҚР ДСМ Медициналық және фармацевтикалық бақылау комитеті бөлімінің басшысы Жәмилә Мәдимарова.
Елде қатар түрде контрафактілік және таңбаланбаған дәрілерді анықтау мен алып тастау жұмыстары күшейтілуде. 2026 жылдың бірінші жартыжылдығында шекті бағаның асып кетуінің алты жағдайы анықталды. Бұзушыларға қатысты әкімшілік шаралар қолданылып, салынған айыппұлдардың жалпы сомасы 1,4 миллион теңгені құрады.