Шығыс Қазақстан облысында 21 клиент көрсетілмеген қызмет үшін ақшаны қайтаруға қол жеткізді. Кәсіпкер оларға 3,6 млн теңгеден астам төлейді, деп хабарлайды infohub.kz сайты.
Қазақстан Республикасы Сауда және интеграция министрлігінің мәліметінше, Шығыс Қазақстан тұрғындары жеке кәсіпкермен дұрыс тамақтану рациондарын жеткізуге шарт жасасып, қызмет ақысын алдын ала төлеген.
«Облыс тұрғындары ШҚО сауда және тұтынушылар құқығын қорғау департаментіне көмек сұрап жүгіне бастады. Нәтижесінде бұл оқиғаның артында бір ғана наразы клиент емес, дәл осындай жағдайға тап болған 21 тұтынушы тұрғаны анықталды», — делінген хабарламада.
Тұтынушылар мәселені кәсіпкермен тікелей шешуге тырысқан. Департамент оған сотқа дейінгі талап-арыз жолдағанымен, ақша қайтарылмаған.
Осыдан кейін ведомство ұжымдық талап-арызбен сотқа жүгінген.
«Қазақстан Республикасының "Тұтынушылардың құқықтарын қорғау туралы" Заңы азаматтардың қызметтің тиісті сапасын талап ету құқығын тікелей көздейді, ал егер қызмет тиісті түрде көрсетілмесе немесе орындаушы міндеттемелерін орындамаса — шартты бұзып, төленген ақшаны қайтаруды талап етуге болады», — деп хабарлады Сауда министрлігі.
Заң сондай-ақ уәкілетті органға, егер бірдей бұзушылық оннан астам адамның құқығын қозғаса, белгісіз топтағы тұтынушылардың мүддесін қорғау үшін сотқа жүгінуге мүмкіндік береді. Бұл жағдайда 21 клиент туралы сөз болып отыр.
«Департамент Өскемен қаласының азаматтық істер жөніндегі ауданаралық сотына ұжымдық талап-арыз жолдап, зардап шеккен клиенттердің құқығын қорғауды және көрсетілмеген қызмет үшін ақшаны қайтаруды талап етті. 2026 жылғы 16 шілдеде сот департаменттің талап-арызын қанағаттандырып, бұл оқиғаға нүкте қойды», — деп қосты ведомство.
Айта кетейік, материалдық залалдың негізгі сомасы 3 055 138 теңгені құрады. Тағы 611 028 теңге тұрақсыздық айыбы ретінде өндірілді. Нәтижесінде 21 тұтынушыға 3 666 166 теңге төленуі тиіс.