Orda.kz интернет-басылымының бұрынғы бас редакторы Гүлнара Бажкенова сегіз жылға бас бостандығынан айырылып, жазасын өтеу екі жылға кейінге шегерілді. Мұндай үкімді Алматы қаласы Бостандық ауданының №2 аудандық соты шығарды, деп хабарлайды infohub.kz сайты.
Сот Бажкенованы өзіне сеніп тапсырылған мүлікті иемдену немесе ысырап ету, заңсыз кәсіпкерлікпен айналысу және әдейі жалған ақпарат тарату фактілері бойынша кінәлі деп таныды.
Сот мәліметінше, 2024 жылдың қарашасынан 2025 жылдың желтоқсанына дейін ЖШС басшысы қызметін атқара отырып, ол компанияның шоттарынан 88,1 миллион теңгеден астам қаражатты жымқырған. Ақша жарнамалық, кәсіби және ғылыми қызметтердің ақысы ретінде бақылауындағы жеке кәсіпкердің шотына аударылған. Сонымен қатар, компания қаражаты есебінен оның ұлының жеке халықаралық мектептегі оқу ақысы төленген.
Тағы 121,2 миллион теңгені Бажкенова Алматыдағы пәтерлерді сатып-сатудан алған. Бұл ретте ол кәсіпкерлік субъектісі ретінде тіркелмеген және алған табысынан салық төлемеген.
Істе сондай-ақ 2024–2025 жылдары әдейі жалған ақпарат таратудың сегіз эпизоды бар. Сот хабарламасына сәйкес, ақпараттық-талдау порталының бас редакторы қызметін атқара отырып, Бажкенова алдын ала сөз байласқан адамдар тобында әрекет еткен. Ақпарат интернет-ресурстар мен әлеуметтік желілер арқылы таратылып, соттың бағалауынша, азаматтарға, ұйымдарға және мемлекетке елеулі зиян келтірген.
«Сот үкімімен Б. кінәлі деп танылып, БАҚ, журналистика, блогинг, жария іс-шаралар және өзге де қоғамдық қызмет саласында қызмет атқару құқығынан 5 жылға айыра отырып, 8 жылға бас бостандығынан айыру жазасы тағайындалды. Сондай-ақ оған БАҚ-қа қатысты ұйымдарда басшылық және материалдық жауапты лауазымдарды атқаруға тыйым салынды», — делінген сот хабарламасында.
Негізгі жазадан басқа, Бажкеновадан 95,9 миллион теңге материалдық залал, 2,8 миллион теңге мемлекеттік баж және 6,8 миллион теңге заңгерлік көмек пен іс жүргізу шығындары өндірілді.
Бажкенова тағайындалған мерзімді дереу өтей бастамайды. Сот ҚК-нің 74-бабының 1-бөлігін қолданып, оның 14 жасқа толмаған баласы болуына байланысты жазаны өтеуді екі жылға кейінге шегерді.
Үкім заңды күшіне енген жоқ.
Бұған дейін «Курсив» 2025 жылдың желтоқсанында тергеу соты ORDA бас редакторы Гүлнара Бажкеноваға қатысты екі айлық үй қамауын санкциялағанын жазған болатын. Сол күні басылым редакциясында және журналистің пәтерінде тінту жүргізілген. Алматы полициясы әдейі жалған ақпарат тарату фактілері бойынша бірнеше қылмыстық іс қозғалғанын хабарлаған.