2025 жылдың қорытындысы бойынша Қазақстанда интернет-алаяқтықтың 28 851 фактісі тіркелді, бұл жеті жыл бұрынғы көрсеткіштен 55 еседен астамға артық, деп хабарлайды infohub.kz сайты.
Finprom порталының дерегінше, елдегі әрбір төртінші қылмыс интернет-алаяқтыққа қатысты. Бұл санатқа жалған SMS-хабарламалар мен «банк қызметкерлерінен» қоңыраулар, фишинг, желідегі жалған хабарландырулар, алаяқтық онлайн-сатып алулар, аккаунттарды бұзу, қаржы пирамидалары мен инвестициялық жобалар, сондай-ақ интернеттегі басқа да құқыққа қарсы әрекеттер кіреді.
2025 жылы интернет-алаяқтықтың 28,9 мың жағдайы тіркелді, бұл елдегі барлық қылмыстардың 23,3%-ын құрайды. Салыстыру үшін: 2018 жылы мұндай қылмыстық құқық бұзушылықтардың барлығы 517-сі ғана анықталған. Осылайша, жеті жыл ішінде олардың саны 55 еседен астамға өсті.
Айта кетерлігі, үш жыл қатарынан өскеннен кейін интернет-алаяқтық саны азая бастады. 2026 жылдың қаңтар–шілде айларында Қазақстанда мұндай қылмыстың 13,1 мыңы тіркелді – бұл өткен жылдың сәйкес кезеңінен 10,3%-ға аз. Нәтижесінде интернет-алаяқтықтың жалпы қылмыс құрылымындағы үлесі 19,5%-ға, ал алаяқтықтың барлық түрлері арасында 57%-ға дейін төмендеді.
2026 жылы қазақстандықтар көбінесе банктерден деген жалған SMS және қоңырауларға тап болды – 2,9 мың жағдай. Тағы 2,7 мың жағдай фишингтік сайттармен, электрондық поштамен, сілтемелермен және зиянды қосымшалармен байланысты. 2,6 мың жағдай қызмет көрсету туралы хабарландыруларға, 1,9 мың – онлайн-сатып алуларға, 1,3 мың – онлайн-несие ресімдеуге тиесілі.
Аз таралған схемалардың қатарында – қаржы пирамидалары мен инвестициялық жобалар, аккаунттар мен домендерді бұзу, криптовалютамен алаяқтық, әлеуметтік желілер мен мессенджерлердегі таратулар, жалған қайырымдылық, лотереялар, викториналар, конкурстар және онлайн-казино. Бұған дейін алаяқтар қазақстандықтарды бейтаныс адамдарға ақша төлеуге қалай мәжбүрлейтіні, сондай-ақ «сақтандыру көмекшілерінің» қауіптілігі туралы хабарланған болатын. Сонымен қатар, Қазақстанда дропперлік үшін қылмыстық жауапкершілік қарастырылған – азамат саналы түрде немесе байқамай алаяқтардың схемаларына қатысып, алған ақшаны басқа шоттарға аударған кезде.