Ұлттық статистика бюросының дерегінше, биылғы 1 тамыздағы жағдай бойынша Қазақстан халқының саны 20 604 819 адамға жетті. Жылдың алғашқы жеті айында өсім 104 997 адамды құрады, деп хабарлайды infohub.kz.
Гендерлік тұрғыдан елде 10 531 747 әйел және 10 073 072 ер адам тұрады. Осылайша, әйелдер халықтың көпшілігін құрайды.
Урбанизация негізгі үрдіс болып қала береді: қалаларда 13,2 миллионнан астам адам тұрады, ал жыл басынан бері қала тұрғындарының саны 126 649 адамға өсті. Ал ауыл тұрғындарының саны 21 652 адамға азайып, қазір ауылдық жерлерде шамамен 7,4 миллион қазақстандық тұрады.
Халықтың негізгі бөлігі ірі қалалар мен тығыз қоныстанған аймақтарда шоғырланған. Халық саны бойынша Алматы көш бастап тұр — шамамен 2,3 миллион тұрғын. Екінші орында Түркістан облысы — шамамен 2,1 миллион адам. Астанада шамамен 1,6 миллион адам тұрады, Алматы облысында да осындай көрсеткіш. Шымкент халқы шамамен 1,3 миллион адамды құрайды.
Бұған дейін «Курсив» Қазақстан ЕАЭО-да нақты жалақы төмендеген жалғыз ел болғанын хабарлаған еді.