Қазақстан тауларынан 19 жыл бұрын жоғалған альпинисттің денесі табылды. Ер адамның сүйегін 19 тамызда Северцев мұздығынан түсірген, деп хабарлайды infohub.kz сайты.
Қайтыс болған адамның рюкзагын қызы таныған. Алматы тұрғыны Анастасия Ахметова Facebook-те достары — Беларусь туристері — таудан дене тауып алғаны туралы әңгіменің жалғасын айтып берді.
Әлеуметтік желі қолданушылары табылған ер адамды фотосуреттегі жабдықтары арқылы тануға болады деп болжады. «Мұндай рюкзактар 90-жылдардың соңы мен 2000-жылдардың басында кең тараған — ауыр металл каркасымен. Бұл дененің тауда шамамен 20 жыл жатқанын білдіреді», — деп атап өтті олар.
Көп ұзамай жарияланым авторына жоғалған альпинисттің болжамды қызы Нелля Михеева хабарласты. «19 жылдан кейін әкемнің сүйегі табылды. Таңертең құрбым біздікіне қатты ұқсайтын рюкзактың фотосы бар жазбаны жіберді. Кейін сол жазбаны күйеуім де жіберді. Мен ТЖМ-ге хабарластым, маған денені түсірген құтқарушының телефон нөмірін берді, тергеушінің де нөмірін берді. Ол барлық фотосуреттер мен құжаттарды жіберуді сұрады. Кейін қайта қоңырау шалып, рюкзактан әкемнің атына жазылған куәлік табылғанын айтты», — деді қыз сторисінде.
Ол ер адамның денесінен өтіп кете алмаған туристерге, ақпарат таратқан блогерлер мен БАҚ-қа, сондай-ақ құтқарушылар мен полиция қызметкерлеріне шын жүректен алғысын білдірді.
Бұған дейін «Курсив» ТЖМ тікұшағы қайтыс болған ер адамның денесін 3400 метр биіктіктен түсіргенін хабарлаған болатын, бұл туралы құтқарушыларға Беларусь альпинистері хабарлаған еді.