Қызылордада бір топ жүргізуші интернетке тараған бейнежазбадан кейін жауапкершілікке тартылды. Кадрларда автокөлік иелері маневр жасау ережелерін және жол жүрісінің басқа да нормаларын бұзғаны көрінеді, деп хабарлайды infohub.kz сайты.
Polisia.kz-тің хабарлауынша, бұзушылар полиция қызметкерлерінің әлеуметтік желілерді бақылауы барысында анықталған. Бейнежазбада бірнеше жүргізуші қала аумағында кортеж ұйымдастырғаны көрсетілген. Олар жол жүрісі ережелерін елемей, маневр жасау және авариялық сигналды пайдалану тәртібін бұзған, сондай-ақ мемлекеттік тіркеу нөмірлерінсіз көлік құралдарын басқарған.
Ведомствоның мәліметінше, оқиғаға қатысушылардың барлығы анықталып, полицияға жеткізілген. Олар Қызылорда тұрғындары, жастары 20 бен 35 аралығында. Құқық бұзушыларға қатысты қолданыстағы заңнама аясында шаралар қабылданды. Бір көлік арнайы тұраққа қойылды.
Ішкі істер министрлігі полиция әлеуметтік желілерді бақылауды жалғастырып жатқанын және мұндай фактілердің ешқайсысы назардан тыс қалмайтынын атап өтті. Әрбір құқық бұзушылыққа тиісті құқықтық баға беріледі. Ведомство азаматтарды жол жүрісі ережелерін қатаң сақтауға шақырып, жолдың жүру бөлігін жабу, дыбыстық сигналды заңсыз пайдалану немесе қауіпті маневрлер жасау — бұл заңға қайшы әрекеттер екенін және міндетті түрде жауапкершілікке әкеп соғатынын ескертті.