Біржан сал ауданының прокуратурасы жергілікті органдардың нормативтік құқықтық актілерін талдау кезінде жеке деректерді қорғау туралы заңнаманың бұзылғанын анықтады. Бұл бағыттағы жұмыс тұрақты негізде жүргізіліп, азаматтардың конституциялық құқықтарын қамтамасыз етуге бағытталған, деп хабарлайды infohub.kz.
Анықталғандай, аудандық мәслихаттың 2024 жылғы 25 желтоқсандағы № С-18/3 шешімімен жайылымдарды басқару жоспары бекітілген. Ашық қолжетімділікте орналастырылған құжатта 2 мыңға жуық жер пайдаланушының жеке деректері болған. Жарияланған мәліметтердің қатарында тегі, аты, әкесінің аты, ЖСН, БСН, сондай-ақ кадастрлық нөмірлері мен аудандары көрсетілген жер учаскелері туралы ақпарат бар.
Прокуратурада атап өткендей, ақпараттың мұндай жария болуы Қазақстан Республикасы Конституциясының 21-бабына және «Жеке деректер және оларды қорғау туралы» заңның ережелеріне қайшы келеді. Сонымен қатар, бұл деректерді заңсыз пайдалану, оның ішінде ықтимал алаяқтық әрекеттер үшін қауіп төндірді.
Прокурорлық ықпал ету қорытындысы бойынша мәслихаттың шешімі күшін жойды. Осылайша, жеке деректердің одан әрі таралуына жол берілмей, көптеген азаматтардың құқықтары қорғалды.
Ведомство халықтың құқықтары мен заңды мүдделеріне әсер ететін бұзушылықтарды анықтау және жолын кесу бойынша жұмыстардың жалғасатынын атап өтті.