Қазақстанда «неке тіркеу мерзімін ұзарту» қажеттігі туралы алаяқтық ақпарат таралуда, деп хабарлайды infohub.kz сайты.
Әділет министрлігінің ресми өкілі Талғат Уәли неке-отбасы заңнамасына сәйкес, неке бір рет тіркелетінін және оның қолданылу мерзімі белгіленбегенін түсіндірді. Сондықтан оны ұзарту талап етілмейді.
Неке тек ерлі-зайыптылардың біреуінің немесе екеуінің арызы бойынша ажырасу арқылы немесе заңда көзделген өзге жағдайларда ғана тоқтатылуы мүмкін.
Ажырасу тіркеуші орган арқылы немесе сот тәртібімен жүзеге асырылады. Бірінші жағдайда неке ажырасуды мемлекеттік тіркеу күнінен бастап, екіншісінде сот шешімі заңды күшіне енген күннен бастап тоқтатылады.
Әділет министрлігі мұндай хабарламаларға сенбеуге, олардағы сілтемелерге өтпеуге және жеке деректерді үшінші тұлғаларға бермеуге шақырды.
Азаматтарға шынайы ақпарат алу үшін тек ресми көздерді пайдалану ұсынылады.
Бұған дейін «Курсив» алаяқтардың қазақстандықтардың ақшасы мен жеке деректерін ұрлау үшін жасанды интеллект пен басқа да технологияларды жиі қолданатынын жазған болатын. Кең таралған схемалардың қатарында банк пен құқық қорғау органдарының жалған қызметкерлерінен қоңырау шалу, кредиттердің бекітілгені туралы хабарламалар, фишингтік сілтемелер және туыстардың дауысын алмастыру бар.
Астана прокуратурасы бөгде адамдарға SMS-кодтарды, парольдерді, CVV/CVC-кодтарды және банк карталарының деректерін хабарлауға, бейтаныс адамдардың нұсқауы бойынша қашықтан қол жеткізуге арналған қосымшаларды орнатуға және ақшаны «қауіпсіз шоттарға» аударуға болмайтынын ескерткен.