Шетелде білім алып жатқан қазақстандық студенттер шетелдік шоттары мен активтері болса, салық декларациясын тапсыруға міндетті, деп хабарлайды infohub.kz сайты.
Мемлекеттік кіріс органдары шетелдік оқу орындарында білім алып жатқан қазақстандық студенттерге жалпы декларациялау мәселелері бойынша түсініктеме жариялады. 2025 жылға арналған салық есептілігін тапсырудың негізгі кезеңі 2026 жылғы 15 қыркүйекте аяқталады.
Білім алу мақсатында шетелде жүрген қазақстандықтар ҚР салық резиденті мәртебесін сақтайды. Оларда декларация тапсыру міндеті тек келесі жағдайлардың бірі болғанда туындайды: 2025 жылғы 31 желтоқсандағы жағдай бойынша шетелдік банк шоттарындағы жиынтық қалдық 1 000 АЕК-тен (3,9 млн теңге) асатын болса; ел аумағынан тыс жерде тіркелген мүліктің (жылжымайтын мүлік, көлік, бизнестегі үлес, бағалы қағаздар, цифрлық активтер) болуы; 20 мың АЕК-тен (78,6 млн теңге) асатын сомаға ірі мәмілелер жасау.
2025 жылғы 1 қаңтардан бастап жалпы декларациялаудың халықтың кең топтарына арналған төртінші кезеңінің күші жойылды, бұл студенттердің көпшілігін негізгі есептіліктен босатты. Сонымен қатар, 2026 жылғы 1 қаңтардан бастап күшіне енген жаңа Салық кодексі шетелдік жоғары оқу орындарының стипендиялары мен гранттарын табыс салығынан босатты.
Ведомство шетелдік шоттарды жасырудың тиімсіз екенін ескертеді, өйткені Қазақстан халықаралық автоматты алмасу аясында қаржылық мәліметтерді тұрақты түрде алып отырады. Декларацияны белгіленген мерзімде тапсырмау әкімшілік айыппұл салуға әкеп соғады, оның мөлшері 15-тен 30 АЕК-ке дейін. Құжаттарды салық төлеушінің кабинеті және банктік мобильді қосымшалар арқылы онлайн режимде тапсыруға болады.