Қазақстанда үй жануарларының аттарының танымалдығы қорытындыланды: иттерге көбінесе Ақтөс, Шарик және Рекс, ал мысықтарға — Мурка, Муся және Барсик деген аттар беріледі. Мұндай деректерді Экология және табиғи ресурстар министрлігі TAÑBA үй жануарларын есепке алудың бірыңғай ақпараттық жүйесіне сілтеме жасап жариялады, деп хабарлайды infohub.kz.
Қазіргі уақытта жүйеде 400 мыңға жуық үй жануары тіркелген. Олардың басым көпшілігі — иттер мен мысықтар: 291 761 ит және 107 414 мысық.
Иттер арасында ең көп таралған ат — Ақтөс, оны 8 863 жануар иеленген. Екінші орында — Шарик (6 027 ит), үшіншіде — Рекс (5 409). Одан кейін Тузик (4 243), Лайка (4 137), Арлан (3 012), Мойнақ (2 382), Алапар (2 056), Барсик (2 004) және Барбос (1 963) тұр.
Мысықтар арасында Мурка аты көш бастап тұр — бұл атпен 2 236 жануар тіркелген. Келесі орындарда — Муся (1 529), Барсик (1 491), Мурзик (842), Соня (833), Рыжик (721), Симба (698), Алиса (657), сондай-ақ Вася мен Кузя — 604-тен жануар.
TAÑBA жүйесінде тек мысықтар мен иттер ғана емес. Тізілімде сегіз қоян, төрт күзен, сондай-ақ бір тасбақа, сәндік егеуқұйрық, ергежейлі шошқа, хомяк және капибара тіркелген.
Сирек кездесетін жануарларда ерекше аттар кездеседі. Мәселен, жүйеде Айша атты тасбақа, Томпи атты хомяк, Библик атты ергежейлі шошқа, Финик атты сәндік егеуқұйрық және Борис атты капибара бар. Қояндар арасында Кембридж, Оксфорд, Рафинад және Снежинка, ал күзендер арасында — Пирожок, Умка, Кипиш және Жижа тіркелген.
Жүйеде теңіз шошқалары, шиншиллалар, қояндар, маймылдар және кірпілер сияқты басқа да үй жануарларының түрлеріне арналған санаттар қарастырылған. Әзірге бұл түрдегі жануарлар базада жоқ.
TAÑBA-да жануарды тіркеу кезінде электронды паспорт қалыптастырылады. Оған аты, тұқымы, жынысы, туған күні, идентификациялық нөмірі және иесі туралы мәліметтер енгізіледі. Цифрлық профильде вакцинация, стерилизация және басқа да ветеринарлық процедуралар туралы ақпарат сақталады.
Экология министрлігінде бірыңғай цифрлық есеп жануарды тезірек идентификациялауға және оның жағдайы мен жүргізілген ветеринарлық процедуралар туралы өзекті деректер алуға мүмкіндік беретінін атап өтті.
Бұған дейін «Курсив» eGov Mobile қосымшасында үй жануарының цифрлық паспорты қолжетімді болғанын жазған болатын. Құжатты «Цифрлық құжаттар» бөлімінен ашуға болады, сондықтан жануар иелеріне қағаз паспортты өзімен алып жүрудің қажеті жоқ.