Qazaqstanda 2027 jyldan bastap keıbir áleýmettik járdemaqylardy esepteý tásilin ózgertý josparlanýda: aılyq eseptik kórsetkish (AEK) ósse de, jekelegen tólemder burynǵy deńgeıde qalýy múmkin. Bul QR Qarjy mınıstrligi jarıalaǵan 2027–2029 jyldarǵa arnalǵan respýblıkalyq búdjet jobasynan kórinedi, dep habarlaıdy infohub.kz saıty.
Qujatqa sáıkes, 2027 jyly AEK 8,5%-ǵa ósip, qazirgi 4 325 teńgeniń ornyna 4 693 teńgeni quraýy múmkin. Ádette AEK-tiń ulǵaıýy osy kórsetkishke baılanysty járdemaqylardyń da ósýine ákeletin. Alaıda jańa búdjet jobasynda keıbir áleýmettik kómek túrlerin esepteý úshin AEK-ti 2026 jylǵy deńgeıde saqtaý usynylýda.
Jobanyń 11-baby 1-tarmaǵynda azamattardyń jekelegen sanattaryna áleýmettik járdemaqylardy esepteý úshin AEK 4 325 teńge mólsherinde qalatyny kórsetilgen. Bul QR Áleýmettik kodeksiniń 10-baby 1-tarmaǵynyń 1), 6) jáne 9) tarmaqshalarynda, sondaı-aq QR «Jer asty jáne ashyq taý-ken jumystarynda, erekshe zıandy jáne erekshe aýyr eńbek jaǵdaılarynda nemese zıandy jáne aýyr eńbek jaǵdaılarynda jumys istegen adamdarǵa arnalǵan memlekettik arnaýly járdemaqy týraly» Zańynyń 6 jáne 7-baptarynda jáne QR Azamattyq kodeksiniń (erekshe bólim) 945-babynyń 4-tarmaǵynda kózdelgen járdemaqylarǵa qatysty.
Osylaısha, kelesi memlekettik kómek túrlerin alýshylar tólemderdiń ósýin kórmeıdi: balalary bar otbasylardy áleýmettik qorǵaý (týýǵa, bala kútimine, kópbalaly otbasylarǵa jáne t.b. járdemaqylar); azamattardyń jekelegen sanattaryna arnaýly memlekettik járdemaqy túrindegi áleýmettik kómek (Uly Otan soǵysynyń ardagerleri, olarǵa teńestirilgen adamdar, «Halyq qaharmany» ataǵyn alǵan azamattar); zeınetaqy tólemderin nemese memlekettik bazalyq zeınetaqy tólemin, sondaı-aq memlekettik áleýmettik járdemaqylardy alýshy qaıtys bolǵan jaǵdaıda jerleýge birjolǵy tólem.
Kúnkóris mınımýmy (KM) boıynsha da osyndaı jaǵdaı qalyptasýda. Jalpy kórsetkish 50 851 teńgeden 55 173 teńgege deıin ósedi, biraq keıbir járdemaqylardy esepteý úshin onyń mólsheri 50 851 teńge deńgeıinde qalady. Bul QR Áleýmettik kodeksiniń 10-baby 1-tarmaǵynyń 5), 6-1) jáne 8) tarmaqshalarynda kórsetilgen adamdarǵa tólemderge áser etedi.
Sonymen qatar, túzetýler jan basyna shaqqandaǵy ortasha tabysy kedeılik sheginen aspaıtyn adamdarǵa (otbasylarǵa) arnalǵan ataýly áleýmettik kómekke áser etpeıdi. Olar úshin AEK pen KM jańa mólsherde qoldanylady.
Osylaısha, eger respýblıkalyq búdjet jobasy qabyldansa, 2027 jyly AEK pen KM-niń jalpy ósýine qaramastan, keıbir járdemaqylar 2026 jylǵy deńgeıde qalady.