Almaty oblysy polısıa departamenti Nellı Mıheevanyń taýdan tabylǵan adam súıekteri onyń ákesine tıesili degen málimdemesin rastady, dep habarlaıdy infohub.kz.
Almaty oblysy polısıa departamentiniń baspasóz qyzmeti Talǵar aýdanyndaǵy Seversov muzdyǵynan adam denesiniń tabylýyna baılanysty tekserý júrgizilip jatqanyn habarlady.
«Júrgizilgen is-sharalar barysynda qaıtys bolǵan adamnyń jeke basy anyqtaldy. Ol buryn habar-osharsyz ketken Almaty qalasynyń turǵyny bolyp shyqty. Derekterge sáıkes, er adam 19 jyl boıy izdeýde bolǵan. Boljam boıynsha, muzdyqtyń erýi saldarynan dene jer betine shyǵyp, tabylǵan», — dep habarlady polısıada.
Polısıa departamentiniń málimetinshe, qazirgi ýaqytta oqıǵanyń barlyq mán-jaıyn jáne ólim sebepterin anyqtaýǵa baǵyttalǵan qajetti sharalar júrgizilýde. Tekserý qorytyndysy boıynsha qoldanystaǵy zańnama aıasynda tıisti prosesýaldyq sheshim qabyldanatyn bolady.
Eske sala keteıik, bir apta buryn Almaty oblysy Talǵar aýdanyndaǵy Seversov muzdyǵynan Belarýs týrıseri toby adam súıekteri men týrısik jabdyqtardy tapqany belgili bolǵan edi. Keıin qazaqstandyq Nellá Mıheeva Instagram-daǵy stories-ta Almaty oblysynyń taýlarynan tabylǵan súıekter onyń ákesine tıesili ekenin aıtqan.
«Búgin bizdiń otbasy úshin bir jaǵynan qaıǵyly, bir jaǵynan qýanyshty kún. 19 jyldan keıin ákemniń súıegi tabyldy. Seversev muzdyǵy erip, Belarýs týrıseri taýyp aldy, olarǵa úlken rahmet, ótip ketpeı, ákemniń súıegi men rúkzagyn tapqandary úshin», — dedi áıel.
Mıheevanyń aıtýynsha, rúkzaktan ákesiniń atyna jazylǵan jeke kýálik te tabylǵan.