Qazaqstanda neke tirkeý merzimin uzartý qajettigi týraly shyndyqqa janaspaıtyn aqparat taralýda. Ádilet mınıstrligi azamattardy alaıaqtyq sqema týraly eskertedi, dep habarlaıdy infohub.kz.
Vedomstvonyń baspasóz qyzmetiniń málimetinshe, áleýmettik jelilerde jáne ekinshi deńgeıli bankterdiń qosymshalary arqyly «neke tirkeý merzimin uzartý» talaby bar habarlamalar taratylýda. Mınıstrlik bul aqparattyń alaıaqtyq sıpatyn atap ótti.
Ádilet mınıstrliginiń resmı ókili Talǵat Ýálı túsindirgendeı, neke-otbasy zańnamasyna sáıkes, neke bir ret tirkeledi jáne onyń qoldanylý merzimi bolmaıdy, sondyqtan ony uzartý qajet emes. Nekeni toqtatý tek erli-zaıyptylardyń bireýiniń nemese ekeýiniń aryzy boıynsha ajyrasý arqyly, sondaı-aq zańda kózdelgen ózge jaǵdaılarda júzege asyrylady.
Ajyrasý tirkeýshi organ arqyly nemese sot tártibimen júrgiziledi. Tirkeýshi organ arqyly ajyrasqan kezde neke memlekettik tirkeý kúninen bastap, al sot tártibimen ajyrasqanda sot sheshimi zańdy kúshine engen kúnnen bastap toqtatylady.
Osyǵan baılanysty Ádilet mınıstrligi azamattardy mundaı habarlamalarǵa senbeýge, siltemeler boıynsha ótpeýge jáne jeke derekterin úshinshi tulǵalarǵa bermeýge shaqyrady. Shynaıy aqparat alý úshin tek resmı kózderge júginý usynylady.