Qazaqstanda bir tonna aqbóken múıizi elektrondyq saýdaǵa qoıyldy — lottyń bastapqy quny 1,2 mlrd teńgeden asady, dep habarlaıdy infohub.kz saıty.
Lot e-Qazyna.kz elektrondyq saýda portalynda jarıalandy. Múıizdiń barlyq kóleminiń jalpy quny — 1 227 148 000 teńge. Lot sıpattamasynda múıizdiń uzyndyǵy 25 santımetrge jetetini kórsetilgen. Habarlandyrýǵa tirkelgen sýretterge qaraǵanda, múıizder qoraptarǵa salynǵan.
Satýshy — «Jasyl damý» aksıonerlik qoǵamy. Satýǵa ekologıa jáne tabıǵı resýrstar mınıstri Erlan Nysanbaevtyń 2026 jylǵy 30 shildedegi buıryǵy negiz boldy.
«„Jasyl damý“ aksıonerlik qoǵamyna aqbóken derıvattaryn 1 (bir) tonna kóleminde satýdy júzege asyrý», — delingen qujatta.
Bul sheshim ekologıa jáne tabıǵı resýrstar mınıstriniń 2026 jylǵy 22 shildedegi № 140 buıryǵymen bekitilgen aqbóken derıvattaryn satý qaǵıdalaryna sáıkes qabyldanǵany atap ótilgen. Bul týraly buıryqta jazylǵan.
Sonymen qatar qujatta múıizdiń bir kılogrammynyń quny belgilengen. «Aqbóken múıiziniń bir kılogrammynyń baǵasyn 2600 (eki myń alty júz) AQSh dollaryna balamaly somada belgileý», — delingen buıryqta.