Aqmola oblysynda birneshe jyl boıy alaıaqtyq jasalǵan qylmystyq is tergelýde. Jergilikti turǵyn áıel ulynyń tanysyna senip, aldanyp qalǵan. Oblystyq polısıa departamentiniń habarlaýynsha, kúdikti otbasyna senimdi adam bolyp kirip, túrli syltaýmen aqsha alyp otyrǵan, dep jazady infohub.kz.
Vedomstvonyń baspasóz qyzmetiniń málimetinshe, aqmolalyq polıseıler er adamǵa qatysty qylmystyq isti tergep jatyr. Ol birneshe jyl boıy otbasynyń senimine kirip, túrli máselelerdi sheshýge kómektesemin dep ýáde berip, aqsha alǵan. Polısıanyń dereginshe, aldaýdyń negizgi quraly — senim.
Oqıǵa 2023 jyly bastalǵan. Aldyn ala málimetterge qaraǵanda, jábirlenýshiniń uly ózin iri memlekettik mekemeniń qyzmetkerimin dep tanystyrǵan 31 jastaǵy er adammen tanysqan. Ol túrli máselelerdi sheshýge kómektese alatynyn aıtqan.
«Birte-birte tanystyq jaqyn qarym-qatynasqa ulasty. Er adam jábirlenýshiniń ulymen dos bolyp, úılerine kelip, otbasynyń senimdi adamyna aınaldy», — dep atap ótti Aqmola oblysy polısıa departamentinde.
Áıel tanysyna 2019 jyly sot oryndaýshylary tárkilegen Lada Largus kóligi týraly aıtqan. Er adam kólikti taýyp, satýǵa kómektesemin dep, máseleni sheshý úshin 850 myń teńge qajet ekenin málimdegen.
Keıin ol kredıt rásimdeýge kómektesýdi usynyp, aldyn ala málimetter boıynsha, áıelden taǵy 430 myń teńge alǵan.
Oqıǵa osymen bitpegen. Áıel aqshasyn tıimdi salǵym keletinin bilgen soń, er adam ákesinen qoı satyp alýdy usynǵan. Qoılar kóbeıedi, al baǵymyn ákesi ózi jasaıdy dep ýáde bergen. Janýarlar úshin áıel taǵy 58 myń teńge bergen. Alaıda ýádeler oryndalmaǵan.
Keıin jábirlenýshi aldanyp qalýy múmkin ekenin túsinip, polısıaǵa júgingen.
Polıseıler kúdiktini anyqtady. Onyń atalǵan epızodtarǵa qatysy tekserilýde. Sonymen qatar, oǵan qatysty basqa da aryzdar túsip, quqyq qorǵaý organdary olardy da zerdelep jatyr.