AQSh áskerleri Irannyń Larak aralyndaǵy eki ushyrý qondyrǵysyna soqqy berdi, dep habarlady amerıkalyq sheneýnik. Bul shilde aıynyń sońynan beri AQSH-tyń alǵashqy soqqysy bolyp otyr. Sheneýniktiń aıtýynsha, Islam revolúsıasy saqshylarynyń kúshteri Hormuz buǵazyna teńiz mınalaryn qoıatyn zymyrandardy ushyrýǵa daıyndyq jasap jatqany baıqalǵan.
Irannyń revolúsıalyq saqshylary shabýyl birneshe sarbaz ben azamattyń ólimine jáne jaraqat alýyna sebep bolǵanyn, Tegeran tarapynan «jaýap pen jaza» bolatynyn málimdedi, dep habarlady ırandyq memlekettik BAQ. Fars agenttiginiń habarlaýynsha, ókil AQSH-tyń bul shabýyly úshin ekonomıkalyq jáne áskerı turǵydan jaýap beretinin aıtqan.
Irannyń jartylaı resmı Tasnım agenttigi AQSH-tyń aralǵa dronmen soqqy jasaǵanyn habarlady. AQSh prezıdenti Donald Tramp ótken aptada Hormuz buǵazynyń halyqaralyq sýlaryndaǵy barlyq mınalar joıylǵanyn nemese alynyp tastalǵanyn, al jańa mına qoıatyn kez kelgen keme nemese qaıyq joıylatyny Iranǵa eskertilgenin aıtqan.
AQSH-tyń Iranǵa sońǵy soqqysy shilde aıynyń sońynda bolǵan edi. Sońǵy aptalarda soǵys turalap, Vashıngton Irandy qoldaıtyn elderge aýyr sanksıalar salamyz dep qorqytty.
AQSh pen Izraıl 28 aqpanda Iranǵa shabýyl jasady, al Iran óz kezeginde Izraıl men AQSh áskerı bazalary ornalasqan Parsy shyǵanaǵy elderine soqqy berdi. Iran soǵysy alty aıdan asty. AQSH-Izraıldiń Iranǵa soqqylary men Izraıldiń Lıvanǵa shabýyldary myńdaǵan adamnyń ólimine jáne mıllıondaǵan adamnyń qonys aýdarýyna sebep boldy. Qaqtyǵysta AQSH-tyń on segiz áskerı qyzmetkeri qaza tapty.
Soǵys Hormuz buǵazynyń blokadasyna ákeldi. Buǵazǵa deıin álemde tutynylatyn munaıdyń shamamen besten bir bóligi tasymaldanatyn.