Aqtaýda satyp alýshy syılyqqa alǵan parfúmniń aýystyrylǵanyn úıinde baıqaǵan. Dúken taýardy aýystyrýdan bas tartqan soń, tutynýshy sheneýnikterden kómek suraýǵa májbúr boldy, dep habarlaıdy infohub.kz saıty.
Aqtaýdaǵy satyp alýshy syılyqqa Tom Ford Lost Cherry hosh ıisin satyp alǵan, alaıda onyń ornyna Tom Ford Electric Cherry berilgen. Eki parfúmniń qaptamasy syrttaı uqsas bolǵandyqtan, qatelik tek úıge qaıtyp kelgennen keıin baıqalǵan.
Bul rette taýar ashylmaǵan jáne paıdalanylmaǵan. Qaptamasy da, parfúmniń bastapqy túri de saqtalǵan.
Sol kúni satyp alýshy satýshyǵa qate berilgen taýardy Tom Ford Lost Cherry-ge aýystyrýdy nemese aqshany qaıtarýdy surap ótinish bildirgen. Alaıda satýshy onyń ótinishin oryndaýdan bas tartqan.
«Osydan keıin tutynýshy satýshyǵa jazbasha ótinish joldaǵan, biraq másele sheshilmeı qalǵan. Sonda ol saýda jáne tutynýshylardyń quqyqtaryn qorǵaý departamentinen kómek suraǵan. Mamandar ótinishti qarap, satýshymen tıisti jumys júrgizgen. Nátıjesinde tutynýshynyń talaby qanaǵattandyrylyp, qate berilgen parfúm satyp alynǵan Tom Ford Lost Cherry-ge aýystyryldy», — dep habarlady vedomstvoda.
Departament tutynýshylarǵa taýardy satyp alý kezinde birden tekserýdiń mańyzdylyǵyn eske saldy. Sáıkessizdik anyqtalǵan jaǵdaıda qaptamany, taýardyń túrin jáne satyp alý faktisin rastaıtyn qujattardy saqtaý usynylady.
«Eger satýshy zańdy talaptardy qanaǵattandyrýdan bas tartsa, tutynýshy óz quqyqtaryn qorǵaý úshin túsinikteme men kómek alýǵa bizge júgine alady», — dep túıindedi vedomstvoda.