Mańǵystaý oblysynda 52 jastaǵy Aslan Qydyrbaevtyń qazasyna qatysty sot prosesi aıaqtaldy. Bes balanyń ákesiniń ólimine kináli dep tanylǵan úsh er adam sot aldynda jaýap berdi, dep habarlaıdy infohub.kz.
Lada.kz málimetinshe, sottalýshylardyń biri segiz jylǵa bas bostandyǵynan aıyryldy. Qalǵan ekeýi úsh jylǵa shartty túrde sottalyp, sot zalynan bosatyldy. Úkim zańdy kúshine engen joq.
Qaıǵyly oqıǵa 2025 jylǵy 2 jeltoqsanda boldy. Tórt er adam Qaraqıa aýdanyndaǵy Temir-baba jerine túngi ańǵa shyqqan. Oq atylǵannan keıin Aslan Qydyrbaev qaza tapty. Bastapqyda polısıa bul oqıǵany qarýdy abaısyz ustaý saldarynan bolǵan jazataıym oqıǵa dep habarlady, alaıda marqumnyń týystary bul nusqamen kelispedi. Olardyń aıtýynsha, er adamdar máıitti pıkaptyń artqy jaǵynda shamamen toǵyz saǵat boıy tasyp, eshqandaı kómek suramaǵan.
Otbasy músheleri Aslandy oqıǵa ornynan shamamen 100 shaqyrym jerdegi Jańaózen qalasyndaǵy aýrýhanaǵa aparmaı, shamamen 300 shaqyrym qashyqtyqtaǵy Aqtaýǵa aparǵanyn aıtady. Sondaı-aq týystar qarýdyń sýǵa batyp ketkeni týraly nusqaǵa da senbeıdi.
Memlekettik aıyptaýshy basty aıyptalýshyǵa 17 jyl, al qalǵan ekeýine 15 jyldan bas bostandyǵynan aıyrý jazasyn suraǵan. «Biz kelispeımiz, bul úkimge qarsymyz! Olardy sot zalynan qalaı bosatyp jiberdi? Bul múldem ádiletsiz», — dedi marqumnyń jubaıy Janar Espaeva. Otbasy sot sheshimine shaǵymdanyp, táýelsiz saraptama júrgizýdi kózdep otyr. Aslan Qydyrbaevtan bes bala qaldy.