Aqtóbede otolarıngolog dáriger tórt jasar qyzdyń estý qabiletiniń joǵalýyna ákelgen biliktiligi tómen kómek úshin aýrýhanaǵa 1,75 mln teńge ótemaqy tóleýge mindetteldi, dep habarlaıdy infohub.kz saıty.
Oqıǵa 2023 jyly bolǵan. Bala aldymen jeke klınıkaǵa júgingen, onda irińdi otıt — ortańǵy qulaqtyń irińdeýimen júretin qabynýy anyqtalǵan. Keıin basqa klınıkada «sol jaq bet nerviniń nevralgıasy» dıagnozy qoıylyp, Aqtóbe qalalyq balalar aýrýhanasyna jiberilgen.
Qalalyq aýrýhanada irińdi otıt kezinde qarsy kórsetilgen fızıoterapıa taǵaıyndalǵan. Prosedýralardan keıin qyzdyń jaǵdaıy nasharlaǵan. Anasynyń aıtýynsha, qate dıagnoz qoıý jáne emdeý ınfeksıanyń taralýyna jáne bas súıegine ota jasaýdy qajet etken aýyr asqynýlarǵa ákelgen.
Bala oblystyq balalar aýrýhanasyna aýystyrylǵan, onda shuǵyl ota jasalǵan. Alaıda uzaq ýaqyt boıy antıbıotıkter taǵaıyndalmaı, tek tańý ǵana jasalǵan. Qaıta aýrýhanaǵa jatqyzǵannan keıin konsılıým emdeý taktıkasyn anyqtaǵan, biraq jaǵdaı aýyr kúıinde qalǵan. Anasy Almatydaǵy respýblıkalyq klınıkaǵa júgingen.
Almatyda balaǵa rezeksıalyq trepanasıa jasalǵan — zaqymdalǵan súıek bóligi alynyp, arnaıy plasınamen aýystyrylǵan. Asqynýlar saldarynan qyz bir qulaǵynan estý qabiletinen aıyrylǵan, ekinshi qulaǵynda shýyl saqtalǵan, birinshi dárejeli estý qabiletiniń tómendeýi anyqtalǵan.
Anasy sotqa júgingen. Aqtóbe oblystyq sotynyń azamattyq ister jónindegi alqasy qalalyq jáne oblystyq balalar aýrýhanalaryn árqaısysy 5 mln teńge moraldyq zıan ótemaqysyn tóleýge mindettegen. Qalalyq aýrýhana óz úlesin tólep, keıin kináli qyzmetkerlerden somanyń bir bóligin óteýdi talap etken. Eki medık erikti túrde kelisken, al otolarıngolog dáriger óz kinási dáleldenbegenin aıtyp, bas tartqan.
Aýrýhana jeke talap qoıǵan. Sot dárigerdiń biliktiligi tómen kómek úshin jaýapty ekenin anyqtap, ony 1,75 mln teńge tóleýge mindettegen.
Buǵan deıin Aqmola oblysynda pasıent dárigerlerdiń nemquraılyǵy úshin emhanadan 1,6 mln teńge óndirip alǵany habarlanǵan.