Jyl basynan beri Aqtóbe oblysynda segiz otbasy erekshe sheshim qabyldady: bala kútimine baılanysty demalysqa analar emes, ákeler shyqty. Olardyń barlyǵy oblys ortalyǵynda turady, dep habarlaıdy infohub.kz saıty.
«Dıapazon» portalynyń málimetinshe, byltyr mundaı er adamdar kóbirek bolǵan: 1 tamyzdaǵy jaǵdaı boıynsha bala kútimine baılanysty járdemaqy alýǵa 13 áke ótinish bildirgen.
Zańnama bala bir jasqa tolǵanǵa deıin kútim demalysyn anaǵa da, ákege de — ata-ananyń bireýine rásimdeýge múmkindik beredi. Dástúrli túrde dekretke tek analar shyǵatyn, alaıda sońǵy jyldary muny ákeler de jıi jasaıdy.
«Mundaı jaǵdaılar birli-jarym, biraq bar. Negizinen jas otbasylarda, onda áıel er adamnan kóp tabys tabatyn shyǵar. Mysaly, ol sheteldik nemese taý-ken óndirý kompanıasynda jumys isteıdi», — dedi Aqtóbe oblystyq MÁMS fılıalynyń dırektory Nurlan Kúzeýov.
Ol járdemaqy taǵaıyndaý kezinde bala týylǵanǵa deıingi sońǵy 24 kúntizbelik aıdaǵy tabys eskeriletinin túsindirdi. Tólem mólsheri eki jyldaǵy ortasha aılyq tabystyń 40 paıyzyn quraıdy. Eger adam (er nemese áıel) jumys istep, áleýmettik saqtandyrý júıesine qatysqan bolsa, oǵan bala 1,5 jasqa tolǵanǵa deıin kútim jasaýǵa baılanysty tabysynan aıyrylýyna oraı áleýmettik tólem taǵaıyndalady. Al eger ol jumys istemese, onda memlekettik járdemaqy tólenedi, onyń mólsheri balanyń týý retine baılanysty: birinshi balaǵa — 5,76 AEK (24 912 teńge), ekinshisine — 6,81 AEK (29 454 teńge), úshinshisine — 7,85 AEK (33 952 teńge), tórtinshi jáne odan kóp balaǵa — 8,90 AEK (38 493 teńge).
MÁMS fılıalynda sondaı-aq 2026 jyldyń 7 aıynda dekrettegi ákelerge eń tómengi tólem aıyna 27 680 teńge, eń joǵarysy — aıyna 193 118 teńge bolǵanyn habarlady.