Aqtóbede óz anasyn óltirip, ájesine shabýyl jasaǵan kámeletke tolmaǵan balaǵa qatysty sot prosesi aıaqtaldy. Sot sheshimimen psıhıkalyq buzylýy bar jasóspirim mamandandyrylǵan stasıonarda májbúrli emnen ótedi, dep habarlaıdy infohub.kz.
Qaıǵyly oqıǵa 2025 jylǵy 2 jeltoqsanda Aqtóbe ortalyǵyndaǵy páterlerdiń birinde boldy. 11-synyp oqýshysy 41 jastaǵy anasyna ómirmen syıyspaıtyn jaraqat keltirgen. Sondaı-aq jasóspirimniń 72 jastaǵy ájesi zardap shekti, ol aýrýhanaǵa jatqyzyldy, biraq onyń ómirin saqtap qalýǵa múmkindik týdy.
Páterden aıqaılaǵan daýysty estigen kórshiler polısıaǵa habarlady. Oqıǵa ornyna kelgen tártip saqshylary jasóspirimdi ustady. Tergeý barysynda anyqtalǵandaı, otbasy turmystyq jaǵynan jaqsy bolǵan: jigit jeke mektepte oqyp, úlgerimi jaqsy bolǵan, kórshiler ony tárbıeli ári sypaıy dep sıpattaǵan. Onyń eki inisi de bar.
Sot otyrystary sottalýshynyń qatysýynsyz ótti, óıtkeni ol osy ýaqyt boıy psıhıatrıalyq klınıkada boldy. Sarapshy-psıholog aýrý belgileri týystaryna baıqalmaýy múmkin ekenin, alaıda mektep psıhology olarǵa nazar aýdara alatynyn atap ótti.
Jábirlenýshi bolǵan jasóspirimniń ájesi sotta buryn nemeresinen erekshe eshteńe baıqamaǵanyn aıtty. «Nemerem jaqsy, árqashan maǵan kómektesetin, kishilerimen oınaıtyn, men ol úshin qatty ýaıymdaımyn. Oǵan eshqandaı shaǵym túsken joq. Sol túni ne bolǵanyn bilmeımin», — dep onyń sózin basylym keltiredi.
Sot jasóspirimdi kisi óltirý jáne kisi óltirýge oqtalýda kináli dep tanydy, alaıda psıhıkalyq aýrýyna baılanysty ony qylmystyq jaýapkershilikten bosatty. Májbúrlep emdeý sharasy retinde psıhıatrıalyq stasıonarda emdeý taǵaıyndaldy.
Buǵan deıin Aqmola oblysynyń soty Arshaly aýdanynyń turǵynyna qatysty osyndaı sheshim shyǵarǵan bolatyn, ol óz otbasyn óltirdi dep aıyptalǵan.