Aqtóbede memlekettik baǵdarlamamen salynǵan úsh kópqabatty úıdiń turǵyndary dabyl qaǵyp otyr: úıleri jarylyp, kórshiler birin-biri kórip qalǵan. Bul týraly infohub.kz saıty habarlaıdy.
Aqtóbede memlekettik baǵdarlama aıasynda salynǵan úsh jańa toǵyzqabatty úıdiń turǵyndary shuǵyl túrde kóshirýdi talap etip otyr. Qala turǵyndarynyń aıtýynsha, nebári eki jyl ishinde ǵımarattar jaryqshaqtarǵa tolǵan. Qabyrǵalarda sańylaýlar paıda bolyp, ártúrli páterlerdiń turǵyndary birin-biri kórip qalǵan. Joǵarǵy qabattardan bastalǵan jaryqshaqtardyń biri qazirdiń ózinde eń tómengi qabatqa deıin jetken. Turǵyndar qabyrǵalar tótep bere almaı qalady dep qaýiptenip, úsh úıdiń barlyǵyn kóshirýdi talap etip otyr.
«Biz shyn máninde avarıalyq jaǵdaıda ómir súrip jatyrmyz. Munda múgedekter, qart adamdar, balalar, kópbalaly otbasylar kóp. Biz kún saıyn qorqynyshpen ómir súrgimiz kelmeıdi, erteń oıanamyz ba, tiri qalamyz ba dep oılaǵymyz kelmeıdi», — deıdi Aqtóbe turǵyny Aıgúl Kajenova.
Úsh toǵyzqabatty úıde 200-den astam otbasy turady. Páterlerdi munda kezekte turǵandar: múgedekter, jetimder jáne kópbalaly otbasylar alǵan.
«Túnde ártúrli syqyrlaǵan dybystar estiledi. Mende bári jaqsy edi, bir sátte usaq jaryqshaqtar paıda boldy. Bul ómirge qaýipti. Biz jańa baspana berýdi talap etemiz. Saraptama keldi, bizge osy úıdi zertteý 15-20 kúnge sozylatynyn aıtty. Biraq turǵyndardyń basqa jerge kóshýge múmkindigi joq», — deıdi aktóbelik Botagóz Shakýova.
Turǵyndardyń shaǵymynan keıin ákimdik tekserý bastady. «Qazirgi ýaqytta toǵyzynshy jáne tehnıkalyq qabattarda jaryqshaq emes, paneldiń ózi bólinip tur, sondyqtan biz sarapshylardy shaqyrdyq. Sarapshylardyń qorytyndysynan keıin tıisti jobalaý sheshimi qabyldanyp, soǵan sáıkes joıylady. Qazirgi ýaqytta úıdiń qıraý qaýpi joq», — dedi Aqtóbe qalasy ákimdigi qurylys bóliminiń basshysy Baýyrjan Jantúrın.