Aqtóbe oblysynda qoldanbaly medısınalyq zertteýlerge 1,8 mlrd teńgeden astam qarjy baǵyttaldy. Batys Qazaqstan medısına ýnıversıtetiniń ǵalymdary densaýlyq saqtaýdyń ózekti máselelerin sheshýge arnalǵan alty iri joba boıynsha jumys júrgizip jatyr, dep habarlaıdy infohub.kz saıty.
Atalǵan jobalardyń tórteýi granttyq, ekeýi baǵdarlamalyq-nysanaly ǵylymı jobalar. Máselen, mamandar onkologıalyq aýrýlardy erte anyqtaý ádisterin ázirlep, asqazan obyrynyń aǵymyn boljaý boıynsha zertteýler júrgizýde, radıasıanyń aǵzaǵa áserin zerdelep, jasóspirimder sýısıdiniń aldyn alý joldaryn izdestirýde.
Jańa zertteýlerdiń basty maqsaty — teorıamen shektelmeı, ǵalymdardyń ázirlemelerin aýrýhanalar men emhanalarǵa engizip, aýyr aýrýlardy ýaqtyly anyqtaý jáne ekologıalyq táýekelderdi baǵalaý.
Aqtóbe oblysy ákimdiginiń málimetinshe, óńirde Ǵylym jónindegi keńes te qurylǵan. Ol ǵylymı qaýymdastyq, memlekettik organdar jáne óndiristik kásiporyndar arasyndaǵy ózara is-qımyldy nyǵaıtýmen aınalysady.
Buǵan deıin Densaýlyq saqtaý mınıstrligi áleýmettik jelilerde respýblıkanyń aýyldyq medısınasynda birneshe jylda qandaı ózgerister bolǵanyn, qandaı iri medısınalyq nysandar salynǵanyn jáne qandaı jumystar áli jalǵasyp jatqanyn habarlaǵan bolatyn.
Máselen, 2019 jyldan beri elde 1,2 myńnan astam densaýlyq saqtaý nysany paıda boldy. Olardyń ishindegi irileri — Astanadaǵy Ulttyq ǵylymı onkologıalyq ortalyq jáne 200 tósektik Ulttyq jedel medısınalyq úılestirý ortalyǵy, sondaı-aq Almatydaǵy 350 tósektik Ulttyq juqpaly aýrýlar ǵylymı ortalyǵy. Qazir quny 108 mlrd teńge bolatyn taǵy 51 medısınalyq nysannyń qurylysy júrip jatyr. Olardyń qatarynda kópbeıindi aýrýhanalar men jańa emhanalar bar.