Aqtóbe oblysyndaǵy Úshqudyq aýylynda aýyz sýǵa qatysty daý týyndady. Jergilikti turǵyndar sýdyń sapasyna shaǵymdanyp, salynyp jatqan et kombınaty qosymsha qudyqtarǵa qosylǵannan keıin sý múldem jetpeı qalýy múmkin dep qaýiptenýde, dep habarlaıdy infohub.kz.
Aýyl turǵyndary Astana TV arnasyna aıtqandaı, eldi mekende bir jarym myń adamǵa nebári úsh qudyqtan keledi, onyń bireýi kópten beri jumys istemeıdi. Qalǵan eki sý kózi de kúmán týdyrady. Adamdar sýdyń úzilispen beriletinine jáne sapasynyń nasharlyǵyna shaǵymdanady.
«Qysym óte álsiz, sýdyń sapasy týraly aıtpaı-aq qoıaıyn! Bul sý emes, las balshyq. Keıde elektr qýaty óship, sý berý de toqtaıdy. Sosyn qosqanda, bul sý emes, kir. Ony paıdalaný múmkin emes!», – dedi Úshqudyq aýylynyń turǵyny Batyr Esenjanov.
Endi bar problemaǵa jańasy qosyldy. Aýyldyń janynda et kombınaty salynyp jatyr. Al kásiporyn sol qudyqqa qosylmaq. Aýyl turǵyndary óndiris kóp sý tutyna bastasa, sýdyń ózderine jetpeı qalýynan qorqady.
«Qudyqtarda sý joq, qudyqtan ishýge bolmaıdy. Tipti malǵa da bermeımiz. Endi taǵy et kombınaty bizdiń qudyqtarǵa qosylǵysy keledi. Ózimizge áreń jetip jatyr! Biz et kombınatynyń ózine qarsy emespiz, aýyl sýynyń et kombınatynyń qajetine ketýine qarsymyz. Ózderine jeke qudyq qazdyryp, sony paıdalansyn», – dedi Úshqudyq aýylynyń turǵyny Qalıjan İzbaǵambetov.
Jergilikti ákimdikte kásiporynnyń aýyldyq sý kózine qosylatynyn rastady. Alaıda, sheneýnikterdiń aıtýynsha, qudyqtaǵy sý óndiriste tek ishýge ǵana paıdalanylady. Úshqudyq úshin qosymsha sý kózderin izdeý ázirge nátıje bermeı otyr.
«Úshqudyq boıynsha barlaý jumystary júrgizilýde. Eki jyldan beri sý qoryn taba almaı jatyrmyz. Al et kombınatyna kelsek, olarǵa tek aýyz sýdy paıdalanýǵa ruqsat etilgen. Al tehnıkalyq sý alý úshin, óıtkeni olar táýligine 100 tonnadan astam sý paıdalanady, jobada ózderiniń jeke qudyǵyn burǵylaý qarastyrylǵan», – dep sendirdi Úshqudyq aýyldyq okrýginiń ákimi Berik Aqdáýletov.
Biraq aýyl turǵyndaryn mundaı túsiniktemeler áli tolyq sendirmeıdi. Adamdar jańa óndiris iske qosylǵannan keıin sýdyń barlyǵyna jetetinine senimdi bolǵysy keledi.