Aqtóbede oqýshylar burynǵy jataqhana ǵımaratynda sabaqqa barýǵa májbúr. Jańa mektep qurylysyna arnalǵan jer telimi 30 jyl buryn bólingen, joba daıyn, biraq qarjylandyrý áli joq, dep habarlaıdy infohub.kz.
Burynǵy jataqhanada ornalasqan mektep «Kóktem» turǵyn alabyndaǵy jalǵyz mektep. Jergilikti balalarmen qatar kórshi aýdandar men baqsha qoǵamdarynyń balalary da osynda oqıdy. Nátıjesinde 600 oqýshyǵa eseptelgen ǵımarat eki esege jýyq tolyp ketken.
«„Geolog“, „Saıa“ sıaqty barlyq jaqyn aýdandar osynda oqıdy. Bul jerge mektep salýdy áldeqashan bastaýǵa bolar edi. Basqa aýdandarda eki-eki mektep tur, al bul jerde áli kúnge deıin osy», — deıdi aqtóbelik Qýanysh Qarashev.
«Bul mektep PMK-nyń jataqhanasy bolǵan. Terezesiz, esiksiz eki qabatty eki ǵımarat turdy. Biz 30 jyldan astam mektep talap etip kelemiz. Buryn jeke-jeke adamdar jazsa, endi búkil eldi meken balalardy qorǵaýǵa kóterildi. Óıtkeni olardyń quqyǵy bar! Bir urpaq ósti, ekinshi urpaq ósip keledi, úshinshi urpaqtyń jaryq, ádemi mektepte oqýǵa quqyǵy bar!» — dedi qala turǵyny Altynaı Nurqatova.
Sonymen qatar, dál qasynda jańa mektep qurylysyna arnalǵan jer telimi bos tur. Turǵyndar jaqyn arada zamanaýı synyptar paıda bolady dep úmittengen, biraq ázirge joba tek qaǵaz júzinde.
«Eski mektep ǵımaraty zamanaýı talaptarǵa saı emes. İshi óte tar. Aktovyı zal, sportzal kishkentaı, dálizderde eki adam erkin óte almaıdy. Jańa mektep salýdy neshe ret suradyq. Bizge aqsha joq deıdi. Qalaı?! Bizde iri qala, sonsha iri kásiporyndar bar. Meniń oıymsha, aqsha joq dep aıtý uıat!» — dep ashýlandy qala turǵyny Aınur Jumahanova.
Sheneýnikter jańa mektep qurylysyna qarjy ázirge joq ekenin rastady. Eki jyl buryn 500 oryndyq jańa oqý ornynyń jobasy ázirlengen. Smeta boıynsha aldyn ala quny — 3 mlrd 600 mln teńgeden astam. Qazir jergilikti bılik respýblıkalyq búdjetten qarjylandyrýdy kútip otyr.
«2027 jyly qarjylandyrý qarastyrylsa, qurylysty bastaımyz. Eger qarjy tolyq kólemde bólinse, qurylys merzimi — 7 aı», — dep túsindirdi Aqtóbe oblysy qurylys, sáýlet jáne qala qurylysy basqarmasy basshysynyń orynbasary Aslan Jarasbaev.