Aqtóbeden 30 shaqyrym jerde ornalasqan Jańa aýyl-1 eldi mekeninde 30-ǵa jýyq úı salynǵan, alaıda olardy elektr jelisine qosý áli múmkin bolmaı otyr. Turǵyndar úılerin generatormen jaryqtandyrýǵa, azyq-túlikterin aýladaǵy qudyqtarda saqtaýǵa nemese týystaryna qalaǵa aparýǵa májbúr. Bul týraly infohub.kz saıty habarlaıdy.
Bul qala mańyndaǵy jer telimderi 2018 jyly berile bastaǵan. Sodan beri munda 30-ǵa jýyq turǵyn úı paıda boldy, alaıda kóship kelýshiler sanaýly ǵana — aýylǵa elektr jelisi tartylmaǵan. Sýyq túskende jaryqsyz ómir naǵyz synaqqa aınalady: tamaq ázirleý, úıdi jaryqtandyrý ǵana emes, jylytý da qıynǵa soǵady.
«Kúndiz qozǵaltqyshty qosamyz, keshke akýmýlátorǵa kóshemiz. Biraq ol eki saǵatqa ǵana jetedi. Jazda azyq-túlikti Aqtóbedegi týystarymyzǵa aparyp, keıin sodan tek qajettisin alamyz. Bizge eki nárse kerek — jol jáne jaryq», — deıdi Jańa aýyl-1 turǵyny Samat Imangazın.
Aýyl turǵyndarynyń aıtýynsha, jergilikti bılik elektr jelisin 2026 jyly tartýǵa ýáde bergen. Aýylǵa tehnıka kelgen, biraq jumys tez toqtap qalǵan. Azamattar bıylǵy qysty da sham jaryǵymen, sýyq úılerde qarsy alýdan qorqady.
Elektr jaryǵynan bólek, aýylda sý da, asfált jol da joq. Keıbir turǵyndar aýlalaryna ózderi uńǵyma qazǵan, alaıda olardyń aıtýynsha, bul sýdy ishý múmkin emes — tym tuzdy. Sondyqtan sýdy kórshi aýyldan alady nemese qaladan ákeledi.
«Jańa aýyl-1-diń gaz jáne elektrmen jabdyqtaý máselesi boıynsha: búgingi tańda jumystardy «Aıkom» kompanıasy júrgizýde. Kelesi toqsanda, ıaǵnı qazan-qarasha aılarynda tapsyrý josparlanýda — osy nysandy tapsyrý josparlanǵan. Osy joba júzege asyrylǵanda elektr jaryǵy 2250 telimge beriledi», — dedi Aqtóbe qalasy ákimdiginiń qurylys bóliminiń basshysy Baýyrjan Jantýrın.