Aqtóbe oblysy Muǵaljar aýdanyndaǵy Qandyaǵash qalasynda ornalasqan, jappaı ýlaný oryn alǵan meıramhananyń ıesi men basshysy amnıstıaǵa ilikti, dep habarlaıdy infohub.kz saıty.
Buǵan deıin maýsym aıynda Aqtóbe oblysynda Qandyaǵash qalasyndaǵy meıramhanaǵa barǵannan keıin ishek ınfeksıasynyń belgilerimen Muǵaljar aýdandyq aýrýhanasy men oblystyq klınıkalyq ınfeksıalyq aýrýhanasyna 102 naýqas jatqyzylǵany habarlanǵan bolatyn.
Sol kezde polısıa sanıtarlyq erejelerdi nemese gıgıenalyq normatıvterdi buzý belgileri boıynsha (Qazaqstan Respýblıkasy Qylmystyq kodeksiniń 304-baby) qylmystyq is qozǵady.
Keıin Qandyaǵashtaǵy meıramhanaǵa barǵandardyń ishinde aýrýhanaǵa jatqyzylǵandar sany artqany belgili boldy. Mekeme jabyldy.
Odan ári sanıtarlyq dárigerler Qandyaǵashtaǵy meıramhanadaǵy jappaı ýlanýdy tergeýdi aıaqtady. Tekserý stafılokokk, ishek taıaqshasy jáne birqatar buzýshylyqtardy anyqtady. Nátıjeleri quqyq qorǵaý organdaryna jiberildi.
Búgin jappaı ýlaný oryn alǵan meıramhananyń ıesi men basshysy amnıstıaǵa ilikkeni belgili boldy.
«Qylmystyq is júrgizý barysynda meıramhana basshylyǵy men jeke kásipker taǵylǵan áreketti jasaǵanyna kinásin moıyndady. Sonymen qatar amnıstıa aktisin qoldanýǵa baılanysty qylmystyq is júrgizý toqtatyldy», — dep habarlady NUR.KZ tilshisine Aqtóbe oblysy polısıa departamentiniń baspasóz qyzmetinde.