Qazaqstan Bas prokýratýrasy azamattardy ınternet-alaıaqtyqtyń jańa sqemasy týraly eskertti: qylmyskerler ózderin eGov qyzmetiniń qyzmetkerleri retinde tanystyryp, qońyraý shalyp júr. Sońǵy bir aıdyń ishinde osyndaı 30-ǵa jýyq oqıǵa tirkelgen, dep habarlaıdy infohub.kz saıty.
Qadaǵalaý organynyń dereginshe, qońyraý kezinde alaıaqtar adamǵa onyń atyna elektrondyq sıfrlyq qoltańba jasalyp jatqanyn ne ózge de áreketter júrgizilip jatqanyn aıtady. Keıin áńgimege sybaılastary qosylyp, zańsyz kredıt rásimdelýiniń aldyn alý syltaýymen zardap shekkenderdi ózderi kórsetken shottarǵa aqsha aýdarýǵa kóndiredi.
Bas prokýratýra naqty mysal keltirdi. Taraz turǵynyna ózin «eGov» qyzmetkeri dep tanystyrǵan beıtanys adam qońyraý shalyp, onyń atyna ESQ shyǵarylǵanyn habarlaǵan. Keıin onymen WhatsApp arqyly basqa adamdar baılanysyp, onyń atyna jeti bankte kredıt rásimdelgenin málimdegen. Alaıaqtardyń aılasyna aldanǵan áıel úshinshi tulǵalardyń shottaryna 2 mln teńgeden astam aqsha aýdarǵan. Osy fakti boıynsha sotqa deıingi tergeý júrgizilip jatyr.
Bas prokýratýra qazaqstandyqtardy saq bolýǵa shaqyrady. «Memlekettik organdar men servısterdiń qyzmetkerleri telefon arqyly aqsha aýdarýdy, kredıt rásimdeýdi ne qarajatty «qaýipsiz shottarǵa» aýdarýdy talap etpeıdi. Beıtanys adamdarǵa SMS-kodtardy, qupıasózderdi, bank kartalarynyń derekteri men ESQ-ny habarlamańyz, beıtanys adamdardyń nusqaýymen aqsha aýdarmańyz. Kúdikti qońyraý túsken jaǵdaıda áńgimeni toqtatyp, tıisti memlekettik organǵa nemese bankke resmı baılanys arnalary arqyly ózińiz habarlasyńyz», — dedi qadaǵalaý organynda.