Qazaqstanda alaıaqtar memlekettik organdarǵa Qarjy monıtorıńi agenttiginiń atynan jalǵan resmı hattar jiberip júrgen jaǵdaılar tirkeldi. Jańa alaıaqtyq sqemasy týraly vedomstvonyń ózi eskertti, dep habarlaıdy infohub.kz saıty.
Qarjy monıtorıńi agenttiginiń túsindirýinshe, memlekettik organǵa arnalǵan mundaı hattarda qylmyskerler tekserý júrgizilip jatqanyn syltaýratyp, azamat týraly málimetti — onyń minezdemesin jáne basqa da aqparatty suratady.
«Buǵan deıin alaıaqtar osyǵan uqsas sqemany qoldanǵan: jalǵan hattardy jibergen soń olar azamattarǵa telefon nemese messendjerler arqyly habarlasyp, ózderin QMA qyzmetkeri retinde tanystyryp, túrli syltaýmen derbes jáne banktik derekterin alýǵa ne aqsha talap etýge tyrysqan», — dedi Agenttikte.
QMA Agenttiktiń resmı hattary tek belgilengen tártippen jiberiletinin eske saldy. Vedomstvo qyzmetkerleri telefon arqyly bank shottarynyń derekterin berýdi talap etpeıdi jáne aqsha aýdarýdy suramaıdy. Logotıpi, móri nemese qoly bar degen jeleýmen qujattarǵa senýge bolmaıdy, al kúmándi hat kelgen jaǵdaıda onyń túpnusqalyǵyn Agenttiktiń resmı arnalary arqyly tekserý qajet.
«Beıtanys adamdarǵa derbes jáne banktik derekterińizdi bermeńiz jáne olardyń nusqaýymen aqsha aýdarmańyz», — dep úndedi Agenttikte qazaqstandyqtarǵa.
Kúmán týyndaǵan jaǵdaıda azamattardy QMA Call-ortalyǵyna 1458 nómiri arqyly nemese Kezekshi bólimge +7 (7172) 70-84-79 telefony arqyly habarlasýǵa shaqyrady.