Qostanaı oblysynda alıment boıynsha qaryzy bar boryshkerlerdiń múlki óndirip alynýda, dep habarlaıdy infohub.kz saıty.
Oblys prokýratýrasynyń resmı saıtynda atap ótilgendeı, balalardyń quqyqtary men zańdy múddelerin qorǵaý Qarabalyq aýdany prokýratýrasy jumysynyń basym baǵyttarynyń biri bolyp qala beredi. Alıment óndirip alý týraly sot sheshimderiniń oryndalýyn qamtamasyz etýge erekshe nazar aýdarylady.
Qadaǵalaý qyzmeti barysynda aýdan turǵynynyń biriniń alımenttik mindettemelerdi uzaq ýaqyt oryndamaǵany anyqtaldy. Onyń kámeletke tolmaǵan balasy aldyndaǵy qaryzy 3,6 mln teńgeden asty.
Balanyń buzylǵan quqyqtaryn qalpyna keltirý úshin prokýratýra atqarýshylyq is júrgizý aıasynda sharalar qabyldady. Nátıjesinde 2026 jylǵy 6 mamyrda Qarabalyq aýdandyq soty Qarabalyq kentinde ornalasqan boryshkerdiń turǵyn úıine óndirip alýdy qoldaný týraly uıǵarym shyǵardy.
Taǵy bir jaǵdaıda boryshker birneshe jyl boıy (2019 jyldan bastap) balasyn asyraý jónindegi mindetterin oryndaýdan jaltarǵan. Qaryz somasy 3,4 mln teńgeni qurady.
Prokýratýranyń bastamasymen boryshkerdiń jyljymaıtyn múliginiń 1/2 úlesine óndirip alý qoldanyldy. Qazirgi ýaqytta páter úlesin qaryzdy óteý esebinen óndirip alýshyǵa berý rásimi júrgizilýde.