Almaty ákimdigi 2026 jyly qaladaǵy jasyl jelekterdi sýǵarýǵa qansha qarajat jumsalǵanyn jarıalamady. Ótken jyldyń jazynda áleýmettik jelilerde butalar men aǵashtardyń ylǵalsyz qýrap jatqany týraly kóptegen habarlama tarady. Kursiv LifeStyle basylymy sýǵarý júıesinde qandaı ózgerister bolǵanyn anyqtady, alaıda jýrnalısik saýaldyń bir bóligi ákimdikte jaýapsyz qaldy, dep habarlaıdy infohub.kz saıty.
Komýnaldyq ınfraqurylym jáne turǵyn úı ınspeksıasy basqarmasy 2026 jylǵy 1 sáýirden bastap kósheler men ondaǵy ósimdikter «bir aýdan — bir merdiger» qaǵıdaty boıynsha kútiletinin túsindirdi. Osy model aıasynda qalanyń barlyq 739 magıstraldyq kóshesi «Almaty tazalyq» memlekettik kásipornyna, al eki myńnan astam aýlaishilik jáne aýdandyq kóshe jeke merdigerlerge berildi. Olardyń jumysyn aýdandyq ákimdikter men basqarmanyń ózi baqylaıdy.
Ákimdikte aǵashtar, shóp pen butalar tek 16-20 shilde aralyǵynda, aýa temperatýrasy +42 °C-qa deıin kóterilgen kezde qýraǵanyn málimdedi.
«Atalǵan kezeńde jekelegen shaǵyn ýchaskelerde joǵary temperatýralyq júktemege baılanysty gazon jamylǵysynyń sarǵaıý belgileri baıqaldy. Osyǵan baılanysty qalada jasyl jelekterdi sýǵarý jáne kútý sharalary kúsheıtildi. Qazirgi tańda atalǵan ýchaskelerdiń jaı-kúıi qalpyna keltirildi, gazon jamylǵysy qaıtadan tıisti syrtqy túrge ıe», — delingen resmı jaýapta.
Jýrnalıser óz saýalynda Almatyda 2026 jyly sýǵarýǵa qansha qarajat bólilgenin de suraǵan bolatyn. Bul suraq nazardan tys qaldy.