Almatyda Balalar shuǵyl medısınalyq kómek ortalyǵynyń dárigerleri erekshe oqıǵaǵa tap boldy: bir aýysymda olarǵa magnıt jutqan úsh bala kelip tústi. Olardyń birine ishekten 59 shardy alý úshin kúrdeli ota jasaýǵa týra keldi, dep habarlaıdy infohub.kz saıty.
Almaty qoǵamdyq densaýlyq saqtaý basqarmasynyń málimetinshe, kezekshilik óte aýyr boldy: dárigerler asqazan-ishek jolynda bógde zattar degen birdeı dıagnozben úsh kishkentaı naýqasqa shuǵyl ota jasaýǵa májbúr boldy.
Alǵashqy bolyp qabyldaý bólimine ishi aýyryp, eki jasar sábı kelip tústi. Tekserý bógde zattardyń bar ekenin kórsetti, al ota kezinde hırýrgtar 25 magnıtti alyp tastady.
Birneshe saǵattan keıin aýrýhanaǵa eki jarym jasar ekinshi bala jetkizildi. Onyń qusýy jáne ishi aýyrǵan. Shuǵyl aralasýdan keıin dárigerler 9 magnıtti alyp tastady. Bala stasıonarda on kún boldy.
«Úshinshi bala sol aýysymda, tańerteń, kezekshilik aıaqtalar kezde kelip tústi. Balaǵa 4 jas tolmaǵan, taǵy da ishtiń qatty aýrýyna, álsizdikke, qusýǵa shaǵymdanǵan. Tekserýden keıin asqazan-ishek jolynda kóptegen bógde zattar anyqtaldy. Bizdiń komanda balanyń jińishke isheginen 59 magnıtti alǵanda naǵyz shokty bastan keshirdi. Medısınalyq kómekke júgingen kezde qaýipti zattar jińishke ishektiń qabyrǵalaryn tesip úlgergen bolatyn. Bul sol aýysymdaǵy eń kúrdeli otalardyń biri boldy, 1 tamyz», — dedi Almaty qalalyq balalar shuǵyl medısınalyq kómek ortalyǵy qabyldaý bóliminiń hırýrgi Aıbol Sultanbekov.
Jyl basynan beri ortalyqqa magnıt jutqan 15 bala kelip tústi. Dárigerlerdiń aıtýynsha, árbir mundaı jaǵdaı erekshe nazardy qajet etedi, óıtkeni birneshe magnıt bir-birine tartylyp, ishektiń tesilýine deıin aýyr asqynýlar týdyrýy múmkin.
Dárigerler ata-analardy magnıttik sharlar men osyǵan uqsas oıynshyqtardy kishkentaı balalardyń qoly jetpeıtin jerde saqtaýǵa jáne olardyń nemen oınaıtynyn muqıat qadaǵalaýǵa shaqyrady.