11 qyrkúıekten bastap Almaty-Bishkek tasjolynyń bir bóliginde iri gabarıtti jáne aýyr salmaqty kólikterge ýaqytsha shekteý engiziledi, dep habarlaıdy infohub.kz saıty.
«KazAvtoJol» UK» AQ mamandary respýblıkalyq mańyzy bar Almaty-Bishkek avtojolynyń 25-shaqyrymynda, Qaskeleń qalasynyń mańynda kólik aıryǵynyń monolıtti aralyq qurylymyn ornatý jumystary júrgiziletinin eskertti. Osyǵan baılanysty 11 qyrkúıekten bastap atalǵan ýchaskede bıiktigi 4,5 metrden jáne eni 8 metrden asatyn kólik quraldarynyń qozǵalysyna ýaqytsha shekteý engiziledi.
Shekteý qurylys jumystary tolyq aıaqtalǵanǵa deıin, ıaǵnı 2026 jyldyń sońyna deıin jalǵasady. Bul rette ol jeńil jáne jolaýshylar kólikterine, sondaı-aq belgilengen gabarıttik parametrlerden aspaıtyn júk kólikterine qoldanylmaıdy.
İri gabarıtti jáne aýyr salmaqty kólik júrgizýshilerine baǵytty aldyn ala josparlap, balamaly joldardy paıdalaný usynylady. Jol qozǵalysyna qatysýshylardan engizilip jatqan shekteýlerdi túsinistikpen qabyldaýlaryn suraıdy.