Keshe keshke Almatyda BMW kóligi burylys kezinde aýdarylyp, jol-kólik oqıǵasy boldy. Oqıǵa Ál-Farabı dańǵylynda, VOAD-qa aparatyn tonneldiń aldyndaǵy aıryqta bolǵan, dep habarlaıdy infohub.kz saıty.
Almaty_typical Instagram-paraqshasynda jarıalanǵan aqparatqa sáıkes, júrgizýshi aıryqtan shyǵyp bara jatyp, qýatty kólikti basqara almaǵan. BMW joǵary jyldamdyqpen bordúrge soǵylyp, sodan keıin beton qorshaýdy qulatyp ótken. Qatty soqqydan kólik tóbesimen aýdarylyp, kýágerlerdiń aıtýynsha, jol boıymen shamamen 10 metr syrǵanaǵan. Aıta keterligi, quny shamamen 40 mln teńge bolatyn kólik apat bolǵan kúni ǵana satyp alynǵan.
NUR.KZ tilshisi Almaty qalalyq polısıa departamentiniń baspasóz qyzmetine saýal joldady. Onda oqıǵa Medeý aýdanynda saǵat 21:30-da bolǵanyn habarlady. Polısıa málimetinshe, BMW júrgizýshisi Ál-Farabı dańǵylymen shyǵys baǵytta kele jatyp, Lýganskı kóshesine burylý kezinde tonnelden shyǵa berip, rúlge ıe bola almaı, bordúrge soqqan.
Saldarynan kólik aýdarylǵan. Baqytymyzǵa oraı, eshkim zardap shekken joq. Oqıǵanyń mán-jaıyn Medeý aýdandyq polısıa basqarmasynyń qyzmetkerleri anyqtap jatyr.