Almatyda 40 jastaǵy er adam úıinde qurylys jumystary kezinde aýyr jaraqat aldy. №7 qalalyq klınıkalyq aýrýhanasynyń dárigerleri kúrdeli kóp satyly em júrgizip, jynys múshesiniń protezin ornatty, dep habarlaıdy infohub.kz.
Almaty qoǵamdyq densaýlyq saqtaý basqarmasynyń málimetinshe, naýqas aýrýhanaǵa jambas súıekteriniń synýy jáne zár shyǵarý kanalynyń qýyqtan tolyq ajyraýymen túsken. Mundaı jaraqattar ýrologıa men travmatologıadaǵy eń aýyr túrlerdiń biri sanalady jáne ólimge ákelýi múmkin. Qolaıly jaǵdaıda da olar jıi zár shyǵarýdyń aýyr buzylystaryna, aýyr múgedektikke jáne organızmniń mańyzdy fýnksıalarynyń joǵalýyna ákeledi.
Em birneshe kezeńnen turdy. Birinshi kezeńde dárigerler jambas súıekteriniń repozısıasyn jasap, zaqymdalǵan aımaqty aınalyp ótip, zárdi burý úshin epısıstostoma qoıdy. Sodan keıin zár shyǵarý joldarynyń tutastyǵyn qalpyna keltirý úshin kúrdeli rekonstrýktıvti operasıa jasaldy: zár shyǵarý kanaly qýyqpen qosylyp, tabıǵı zár shyǵarý qalpyna keltirildi.
Aýyr jaraqat saldarynan pasıent erektıldi fýnksıasynan da aıyryldy. Ómir sapasyn qalpyna keltirý úshin mamandar falloprotezdeý jasap, jynys múshesiniń protezin ornatty.
Kezeńdik emniń jáne mýltıdısıplınarlyq dárigerler tobynyń úılesimdi jumysynyń arqasynda pasıent tolyq ońaldy, qalypty ómirge jáne áleýmettik belsendilikke oraldy. Keıin oǵan buryn belgilengen múgedektik alynyp tastaldy.
№7 qalalyq klınıkalyq aýrýhanasynyń dırektory, PhD doktory Nurdos Qadyrbekov bul klınıkalyq jaǵdaı zamanaýı ýrologıa men rekonstrýktıvti hırýrgıanyń múmkindikterin kórsetetinin atap ótti. «Mundaı zaqymdanýlar klınıkalyq tájirıbede eń aýyr jáne sırek kezdesetinderdiń biri bolyp sanalady. Bizdiń mamandardyń kásibıligi men zamanaýı tehnologıalardy qoldanýdyń arqasynda pasıentti qutqaryp qana qoımaı, joǵalǵan fýnksıalardy qalpyna keltirip, oǵan tolyqqandy ómir sapasyn qaıtarýǵa múmkindik týdy», — dep atap ótti ol.