Almaty qalalyq kardıologıalyq ortalyǵy alǵash ret Joint Commission International (JCI) halyqaralyq akredıtasıasyna ıe boldy. Bul sertıfıkat klınıkanyń pasıentter qaýipsizdigi men em sapasynyń álemdik standarttaryna saı ekenin rastaıdy, dep habarlaıdy infohub.kz saıty.
JCI — medısınalyq mekemelerdi pasıentter qaýipsizdigi men em sapasy standarttary boıynsha baǵalaıtyn halyqaralyq uıym. Akredıtasıanyń bolýy klınıkanyń qoıylatyn talaptarǵa saı ekenin bildiredi.
Sertıfıkat úsh jylǵa berildi. Osylaısha, ortalyq Qazaqstandaǵy osyndaı mártebege qol jetkizgen alǵashqy qalalyq aýrýhana jáne eldegi alǵashqy mamandandyrylǵan jedel kardıologıalyq kómek ortalyǵy atandy.
Sarapshylar tekserýdi 19-21 tamyz aralyǵynda júrgizdi. Olar dári-dármek jáne hırýrgıalyq kómek qaýipsizdigin, ınfeksıalyq baqylaýdy, táýekelderdi basqarýdy jáne em sapasyn baqylaý júıesin baǵalady.
Densaýlyq saqtaý mınıstrliginiń dereginshe, 2026 jyldyń segiz aıynda ortalyq 1,1 mln-nan astam adamǵa kómek kórsetken. Munda 7,5 myńnan astam pasıent stasıonarlyq em aldy.
Osy kezeńde ortalyqta 90 myńnan astam ota men prosedýra jasaldy — bul 2025 jyldyń sáıkes kezeńimen salystyrǵanda 35,5%-ǵa kóp.
Ótken jyly ortalyq mamandary tájirıbelerinde alǵash ret júrek transplantasıasyn jasady. Bul ota aýrýhanada jasalǵan eń kúrdeli operasıalardyń biri boldy.
Buǵan deıin Kursiv Health medısınalyq zerthanalardy akredıtteý erejelerine ózgerister daıyndalǵanyn jazǵan edi. Endi rásim onlaın ótedi.