Joǵarǵy Gorelnık mańyndaǵy Kishi Almaty ózenine káriz sýy aǵyzyldy degen aqparat rastalmady. Tekserýdi Almaty týrızm basqarmasy júrgizdi, dep habarlaıdy infohub.kz saıty.
Tekserýge qazaqstandyqtyń Threads áleýmettik jelisinde jarıalaǵan shaǵymy sebep boldy. sergey_eps degen paıdalanýshy Joǵarǵy Gorelnıkten «Medeý» muz aıdynyna deıin túsip kele jatyp, ishindegi las sý tikeleı ózenge quıylyp jatqan qubyrdy baıqaǵanyn jazdy.
«Qorshaýdyń boıymen túsip kele jatyp, jarylǵan gofrli aǵyndy qubyrdy kórdim, odan las sý tikeleı ózenge aǵyp jatyr. Sasyq ıis shyǵyp tur», — delingen jarıalanymda.
Er adamnyń shaǵymyna Almaty týrızm basqarmasy jaýap berdi. Jarıalanym astyndaǵy pikirlerde Joǵarǵy Gorelnık mańyndaǵy Kishi Almaty ózenine káriz sýy aǵyzyldy degen málimet rastalmaǵany habarlandy.
«Tekserý barysynda fotosýrette kórsetilgen gofrli qurylym káriz qubyry emes, kabeldi qorǵaıtyn gofra ekeni anyqtaldy. Foto men vıdeoda túsirilgen sý tabıǵı kózden shyqqan», — dep túsindirdi basqarmada.
Tekserý kezinde aǵyndy sý jiberilgeni anyqtalmaǵany, qalalyq káriz jelileri qalypty rejımde jumys istep turǵany atap ótildi.