Almatyda ońtústik koreı standarttary boıynsha jumys isteıtin zamanaýı kópbeıindi aýrýhana salynady. Aýqymdy jobany Seýlge memlekettik sapary barysynda Qazaqstan Prezıdenti Qasym-Jomart Toqaevqa tanystyrdy, dep habarlaıdy infohub.kz saıty.
Jobanyń bastamashylary — «Shın-Laın» kompanıalar tobynyń basshysy Andreı Shın jáne Hyundae Hospital bas dırektory Kım Bý Sop. Olar memleket basshysyna bolashaq medısınalyq ortalyqtyń tujyrymdamasyn usyndy.
Olardyń aıtýynsha, Almatyda joǵary tehnologıalyq medısınalyq ortalyq qurý josparlanýda. Onda ınovasıalyq emdeý-dıagnostıkalyq jabdyqtar engizilip, ishki prosester Ońtústik Koreıanyń jetekshi klınıkalarynyń úlgisimen beıimdeledi, sondaı-aq qazaqstandyq dárigerler Hyundae Hospital bazasynda úzdiksiz oqyp, taǵylymdamadan ótedi.
«Koreıada álemdegi eń úzdik densaýlyq saqtaý júıeleriniń biri bar, bizdiń mindetimiz — osy tehnologıalar men standarttardy ózimizge, Almatyǵa ákelý», — dep atap ótti kezdesýde Andreı Shın.
Óz kezeginde Kım Bý Sop klınıka koreıdiń qatań sapa jáne qaýipsizdik standarttary boıynsha jumys isteıtinin aıtty. Sonymen qatar ol jańa emdeý-dıagnostıkalyq tehnologıalardy engizý nıetin bildirip, qazaqstandyq medıkterdi úzdiksiz oqytýdy uıymdastyrýǵa ýáde berdi.
Eske salaıyq, sapar aıasynda qazaqstandyq «Shın-Laın» JSHS jáne koreıdiń Chung-Ang University Healthcare System Hyundae Hospital klınıkasy ózara túsinistik týraly memorandýmǵa qol qoıdy.
Buǵan deıin «Kýrsıv» Almatyda zamanaýı onkoortalyq salynatynyn jazǵan. Ol robototehnıkasy bar operasıalyq blokpen, molekýlalyq-genetıkalyq zerthanamen jáne preparattardy daıyndaýdyń avtomattandyrylǵan júıesimen jabdyqtalady. Bul qaterli isikti erte satyda anyqtaýǵa múmkindik beredi.