Almaty oblysynyń Irgeli aýylynda oqý jyly jóndeý jumystary aıaqtalmaǵan mektepte bastaldy: oqýshylar partada otyrdy, qasynda árleý jumystary júrip jatty, aýada shań men boıaý ıisi ańqydy. Segiz oqýshy ózin nashar sezinip, olarǵa jedel járdem shaqyryldy, kóbi jótelgen, bas aýrýy men loqsýǵa shaǵymdanǵan, dep habarlaıdy infohub.kz saıty.
Ata-analardyń aıtýynsha, mekteptiń eski korpýsyndaǵy jóndeý jumystary shildeniń sońynda bastalǵan. Sabaqtar bastaldy, alaıda jóndeýdi aıaqtaý múmkin bolmady. Ata-analardyń sózinshe, boıaý ıisi men shańnan oqýshylarda alergıalyq reaksıa bastalǵan.
Jámıla Imanbekovanyń balasy tórtinshi synypta oqıdy. Sabaq bastalǵannan keıin birneshe kún ótkende ol jótele bastaǵan. Buryn oqýshyǵa astma dıagnozy qoıylǵan, sondyqtan anasy dereý taldaý tapsyryp, keıbir kórsetkishterdiń normadan aıtarlyqtaı joǵary ekenin anyqtaǵan.
«Meniń balamnyń shańǵa alergıasy bar. Osydan tunshyǵyp júrgen eken. Bilgenimde, dereý dárigerlerge júgirdim. Dárigerler rastady, senderde alergıalyq jótel, bala tunshyǵady, entigý bar dedi. Qazirgi tańda ol apparatpen tynys alyp jatyr», — dedi áıel.
Basqa oqýshylar da nashar sezingenin aıtqan. Ata-analardyń aıtýynsha, bir kúni segiz oqýshyǵa birden jedel járdem shaqyrylǵan. Sonymen qatar, qazir ǵımaratta oryn jetispegendikten balalar úsh aýysymda oqıdy, al sabaq uzaqtyǵy 30 mınýtqa qysqartylǵan.
«Ol basy aınalatynyn, loqsıtynyn, basy aýyratynyn, jalpy álsizdik bar ekenin aıtty. Bala áli kúnge deıin aýrýhanada jatyr», — dedi ata-ana Aıman Toqusheva.
Ata-analar eski korpýstaǵy sabaqtar keshege deıin jalǵasqanyn aıtady. Al otbasylar dabyl qaǵyp, quzyrly organdardy shaqyra bastaǵanda, ǵımarat jabyldy. Alaıda mektep dırektory bunymen kelispeıdi. Onyń aıtýynsha, korpýs qyrkúıektiń basynan beri sabaqqa paıdalanylmaıdy, al 10 jáne 11-synyp oqýshylary onlaın oqýǵa kóshirilgen.
«11 qyrkúıekte segiz oqýshy ózin nashar sezindi, sodan keıin jedel járdem shaqyryldy. Keshe, 14 qyrkúıekte, jedel járdem mektepke taǵy keldi. Búgin sol balalardyń jeteýi sabaqqa keldi, jaǵdaılary qanaǵattanarlyq. Ata-analar aýrýhanaǵa jatqyzýdan ózderi bas tartty», — dedi óz nusqasyn L.N. Tolstoı atyndaǵy mekteptiń dırektory Gúljahan Kenizbaeva.
Mektep dırektory jóndeý osy aıdyń sońyna deıin aıaqtalatynyna sendirdi. Qazan aıynda oqýshylar qalypty oqý rejımine orala alady.