Almatyda «Mektepke jol» aksıasy aıasynda áleýmettik osal sanattaǵy 7 669 balaǵa mektep formasy men qural-jabdyq satyp alýǵa 60 myń teńgeden berildi, dep habarlaıdy infohub.kz saıty.
Osy maqsatqa barlyǵy 460 mln teńge bólindi. Qarajat ata-analardyń karta shottaryna tolyq aýdaryldy.
Sonymen qatar, jańa oqý jylynda 133 myń oqýshy tegin ystyq tamaqpen qamtamasyz etildi. Tamaqtandyrý tikeleı bilim berý mekemelerinde uıymdastyryldy.
Almaty mektepterinde barlyǵy 356 myńǵa jýyq bala oqıdy. Bıyl birinshi synypqa 32 922 bala bardy, onyń 30 046-sy memlekettik mektepterge, al 2 876-sy jekemenshik mektepterge.
Buǵan deıin «Kýrsıv» 1 qyrkúıekte Almatyda segiz jańa mektep ashylǵanyn, qalanyń bilim berý ınfraqurylymy jalpy 12 065 oqý ornymen tolyqqanyn jazǵan bolatyn. Jeti mektep «Keleshek mektepteri» ulttyq jobasy boıynsha salynsa, taǵy bir 550 oryndyq mektep «Zerdeli» shaǵyn aýdanynda ashyldy.
Sonymen qatar, rekonstrýksıadan keıin №160 mektep jumysyn qaıta bastady, 340 oryndyq jańa №15 mektep-ınternaty salynyp, №112 jáne №174 mektepterdiń qosymsha ǵımarattary paıdalanýǵa berildi. Osy oqý jylynda Almaty mektepterine alǵash ret 32 myńnan astam birinshi synyp oqýshysy bardy, 11,5 myń oqýshyǵa mektep avtobýstary júrgizildi.