Almaty oblysynyń Eńbekshiqazaq aýdanynda polısıa qyzmetkerleri prokýratýranyń úılestirýimen psıhotroptyq zattar jasaıtyn jasyryn zerthananyń jumysyn toqtatty, dep habarlaıdy infohub.kz saıty.
Eńbekshiqazaq aýdany polısıa basqarmasynyń bastyǵy, polısıa polkovnıgi Tóleý Marhamedovtiń aıtýynsha, jedel-izdestirý is-sharalary barysynda saıajaı alqaptarynyń biriniń aýmaǵynan arnaıy jabdyqtalǵan ǵımarat tabylǵan.
«Tergeý áreketteri kezinde quramynda hımıalyq zattar men prekýrsorlar bar 60-tan astam kanıstr, zerthanalyq jabdyq jáne basqa da qurylǵylar tárkilendi», — dedi polkovnık Marhamedov.
Saraptama qorytyndysyna sáıkes, tárkilengen zattardyń ishinen massasy 388,97 gram a-PVP psıhotroptyq zaty anyqtaldy. Aldyn ala esepteýler boıynsha, bul shamamen 2 myń bir rettik dozaǵa teń.
«Zańsyz óndiristi uıymdastyrdy degen kúdikpen 31 jastaǵy er adam ustaldy. Sot oǵan qamaýǵa alý túrindegi bultartpaý sharasyn sanksıalady», — dep qosty polkovnık Marhamedov.
Qazirgi tańda prekýrsorlar men jabdyqtardy satyp alý kózderi, yqtımal qarjylandyrý arnalary, sondaı-aq quqyqqa qaıshy áreketke qatysy bar basqa da adamdar anyqtalýda.