Áleýmettik jelilerde Almaty oblysynda HQKO qyzmetkeri qyzmettik kólikpen ólimmen aıaqtalǵan jol-kólik oqıǵasyn jasaǵany týraly aqparat tarady. «Azamattarǵa arnalǵan úkimet» memlekettik korporasıasynda bul oqıǵaǵa túsinikteme berdi, dep habarlaıdy infohub.kz.
Jarıalanymǵa sáıkes, HQKO qyzmetkeri qyzmettik kólikpen áıeldi qaǵyp ketken, keıin ol aýrýhanada qaıtys bolǵan. Mátinde aıtylǵandaı, fılıal dırektory bul faktini jasyrǵan. «Qyzmettik kólikti stansıadan taýyp, JKO ornyn tastap ketken, jaqynda ǵana ustady, mamandy qamaýǵa aldy», — delingen habarlamada.
JKO Eńbekshiqazaq aýdanynyń Shelek aýylynda túngi ýaqytta, jumys ýaqytynan tys bolǵany aıtylady. «Azamattarǵa arnalǵan úkimet» memlekettik korporasıasy 2026 jylǵy 11 tamyzda Almaty oblysynda fılıal qyzmetkeri qatysqan JKO bolǵanyn rastady.
«Oqıǵa týraly aqparat alǵannan keıin memkorporasıa óz quzyreti sheginde qyzmettik tergeý júrgizdi, onyń barysynda laýazymdy tulǵalardyń áreketterine, ishki baqylaý deńgeıine jáne qyzmettik kólikti paıdalanýdy uıymdastyrýǵa baǵa berildi», — dep habarlady «Azamattarǵa arnalǵan úkimette».
Memkorporasıanyń málimetinshe, qyzmettik tergeý qorytyndysy boıynsha laýazymdy tulǵalarǵa tártiptik sharalar qoldanyldy. Fılıal dırektorynyń jalpy máseleler jónindegi orynbasary qyzmettik kólikti paıdalanýdy baqylaýdy tıisinshe uıymdastyrmaǵany jáne qyzmettik aqparattyń tolyqtyǵy men obektıvtiligin qamtamasyz etpegeni úshin tártiptik jaýapkershilikke tartyldy. Fılıal dırektory jalpy basshylyq pen fılıal qyzmetin baqylaý, ishki baqylaý júıesin uıymdastyrý, sondaı-aq múliktiń saqtalýy men maqsatty paıdalanylýyn qamtamasyz etý bóliginde qyzmettik mindetterin tıisinshe oryndamaǵany úshin tártiptik jaýapkershilikke tartyldy.
«Bul rette qyzmettik kólikti basqarǵan qyzmetkerdiń tikeleı zańdy jaýapkershiligi máselesi aıryqsha quqyq qorǵaý jáne sot organdarynyń quzyretine jatady. Jaýapkershiliktiń dárejesi men sıpaty qoldanystaǵy zańnamaǵa sáıkes qylmystyq is júrgizý jáne sot talqylaýy aıasynda aıqyndalatyn bolady. Memlekettik korporasıa qaıtys bolǵan áıeldiń týystary men jaqyndaryna qaıǵyra kóńil aıtady», — dep atap ótti «Azamattarǵa arnalǵan úkimette».
Sondaı-aq NUR.KZ tilshisi Almaty oblysy polısıa departamentine túsinikteme surap júgindi.