Almatynyń Medeý aýdanynda Olımpıskaıa kóshesiniń Tyshqanbaev pen Baıqońyr kósheleri aralyǵyndaǵy bóliginde kólik qozǵalysy ýaqytsha shekteldi. Shekteý 18 qyrkúıekke deıin saqtalady, dep habarlaıdy infohub.kz saıty.
Qala ákimdiginiń túsindirýinshe, shara kerneýi 220 kV kabeldik elektr jelisindegi apattyq-qalpyna keltirý jumystaryna baılanysty. Jumystar Olımpıskaıa kóshesindegi №4A úıdiń mańynda júrgizilýde.
«Almatynyń Medeý aýdanynda 18 qyrkúıekke deıin Olımpıskaıa kóshesiniń bir bóliginde kólik qozǵalysy ýaqytsha shekteldi. Shara 220 kV kabeldik elektr jelisindegi apattyq-qalpyna keltirý jumystaryna baılanysty. Jumystar Olımpıskaıa kóshesindegi №4A úıdiń mańynda júrgizilýde. Olar júrgizilip jatqan ýaqytta Tyshqanbaev pen Baıqońyr kósheleriniń aralyǵy jabyldy», — dep habarlady ákimdikte.
Aıta ketý kerek, jóndeý qajettiligi №2363 LEP-220 kV jelisiniń kabeldik bóliginiń zaqymdalýynan týyndaǵan. Sonyń saldarynan energojúıe qazir májbúrli ajyratylǵan sqema boıynsha jumys istep tur, bul Almaty men Almaty aglomerasıasynyń elektrmen jabdyqtaý senimdiligin tómendetedi.
«Qalypty sqemany qalpyna keltirý úshin «Alataý Jaryq Kompanıasy» AQ mamandaryna tikeleı jol tóseminiń astynda apattyq jumystar júrgizý qajet. Jumystar qaýipsizdik talaptaryn saqtaı otyryp, táýlik boıy júrgizilýde. Olar aıaqtalǵan soń buzylǵan abattandyrýdy qalpyna keltirý josparlanýda. Qala turǵyndary men qonaqtarynan kólik qozǵalysynyń ýaqytsha shektelýin eskerip, marshrýttaryn aldyn ala josparlaýdy suraımyz», — dep túsindirdi vedomstvoda.