Almatyda aýdandyq polısıa basqarmalarynyń biriniń ǵımaratyna jarylǵysh zat qoıylǵany týraly qońyraý túsip, tótenshe qyzmetter dabyl boıynsha kóterildi. Bomba týraly aqparat rastalmady, al kúdikti ustaldy, dep habarlaıdy infohub.kz saıty.
Dabyl túsken soń ǵımaratqa tótenshe qyzmetterdiń mamandary dereý keldi. Olar úı-jaılardy jáne aınaladaǵy aýmaqty muqıat tekserdi.
Jarylǵysh qurylǵylar, jarylǵysh zattar, oq-dáriler jáne basqa da qaýipti zattar tabylǵan joq. Polıseıler sotqa deıingi tergep-tekserýdi bastap, habarlama avtoryn anyqtady.
«Sotqa deıingi tergep-tekserý barysynda bizdiń bólimshe qyzmetkerleri habarlama avtoryn anyqtady. Ol 56 jastaǵy er adam bolyp shyqty. Ol is júzinde eshqandaı jarylǵysh qurylǵy qoımaǵanyn, al mınalaý týraly habarlamany qasaqana jasaǵanyn moıyndady. Kúdikti ustalyp, ýaqytsha ustaý ızolátoryna qamaldy. Osy fakti boıynsha qylmystyq is qozǵaldy», — dedi Almaly aýdany polısıa basqarmasynyń bastyǵy Maqsat Pshan.
Er adamnyń nıeti naqtylanbaǵan. Qazir ol ýaqytsha ustaý ızolátorynda otyr.
Polısıa árbir mınalaý týraly habarlama naqty qaýip retinde qaralatynyn eske saldy. Kórineý jalǵan aqparat qylmystyq jaýapkershilikke ákelýi múmkin.
Buǵan deıin «Kýrsıv» astanalyqtyń páterinen esirtki salynǵan 2 myńnan astam orama tabylǵanyn jazǵan bolatyn.