Almatyda polısıa Psıhıkalyq densaýlyq ortalyǵynan óz betimen ketip qalǵan eki naýqasty izdep jatyr. Nellı Shahraı men Denıs Antıpın ortalyqtan ártúrli kúnderi qashyp ketken, dep habarlaıdy infohub.kz.
Lider.kz volonterleri Instagram-da Denıs Antıpın men Nellı Shahraıdyń bet-beınesi jazylǵan izdeý paraqtaryn jarıalady. Olar Almatydaǵy Psıhıkalyq densaýlyq ortalyǵynan ketip qalǵan. Aqparatqa sáıkes, Nellı Shahraı Bostandyq aýdanynda ornalasqan mekemeden 16 sáýirde saǵat 9:00 shamasynda shyǵyp ketken. İzdeý paraǵynda: «Boıy 167 sm, ortasha dene bitimi, kózi qońyr, shashy ashyq-qońyr, arasynda aq túsi bar, uzyn, betinde bórtpe bar. Kıimi: qoıý kók tústi velúr kofta, kúlgin shalbar, kók rezeńke tapkı. Baǵdary buzylǵan. Psıhıkalyq aýytqýy bar» delingen.
Volonterlerdiń málimetinshe, Denıs Antıpın sol ortalyqtan 13 mamyrda qashyp ketken. Er adamnyń boıy 180 sm, ortasha dene bitimi, ashyq-qońyr shashy, aq túsi aralasqan, qońyr kózderi jáne sol kóziniń janynda meńi bar. Ol qara keýdeshe, aq fýtbolka, qara shalbar jáne qara slansy kıgen.
Volonterler qala jáne oblys turǵyndaryna úndeý jasady: «Qala jáne oblys turǵyndaryn izdeý paraqtaryn muqıat qarap, izdeýdegi adamdardyń bet-beınesin este saqtaýlaryn suraımyz. Kóshelerge, aýlalarǵa, podezderge, aıaldamalarǵa, bazarlarǵa, vokzaldarǵa, qoǵamdyq kólikke jáne adam kóp jınalatyn basqa da oryndarǵa nazar aýdaryńyzdar. Uqsas adamdardy baıqaǵan jaǵdaıda, olardy óz betińizben ustaýǵa nemese janjalǵa túsýge tyryspańyz. İzdeý paraǵynda kórsetilgen telefondarǵa nemese 102 nómiri boıynsha polısıaǵa habarlańyz».
Almaty polısıa departamentinde NUR.KZ tilshisine áleýmettik jelilerde taraǵan aqparat medısınalyq mekemeniń eki naýqasynyń joǵalýyna qatysty ekenin habarlady. «Er adam men áıel medısınalyq mekemeni ártúrli kúnderi tastap ketken jáne olar bir-birimen baılanysty emes. Eki fakt boıynsha Bostandyq aýdanynyń polısıa basqarmasynda izdestirý isteri qozǵaldy. Qazirgi ýaqytta azamattardyń ornalasqan jerin anyqtaýǵa jáne olardy medısınalyq mekemege qaıtarýǵa baǵyttalǵan jedel-izdestirý is-sharalarynyń kesheni júrgizilýde», — dep málimdedi polısıada.