Almatyda polıseıler pyshaq ustaǵan jigitter toby týraly habarlama túskennen keıin alty kúdiktini ustady. Janjal kezinde bir adam pyshaq jaraqatyn aldy, dep habarlaıdy infohub.kz saıty.
Túngi oqıǵa Aqsaı shaǵyn aýdanynda boldy. «102» púltine pyshaǵy bar jigitter toby týraly habarlama kelip tústi. Polıseıler dereý oqıǵa ornyna jetip, janjal kezinde bir jigittiń pyshaq jaraqatyn alǵanyn anyqtady.
«İzin sýytpaı «Býran-308» ekıpajy oqıǵaǵa qatysy bolýy múmkin alty jigitti ustady», – dep habarlady polısıadan. Kúdiktiler Áýezov aýdanynyń Polısıa basqarmasyna jetkizildi. Olardyń keıbireýiniń kıiminen qanǵa uqsas izder tabyldy. Sondaı-aq tergeý úshin mańyzy bar zattar alyndy.
Qazir tergeýshiler oqıǵanyń tolyq beınesin qalpyna keltirip jatyr. Olar janjaldyń sebepterin, árbir qatysýshynyń rólin anyqtap, pyshaq jaraqatyn salǵan adamdy tabýy kerek.
«Sotqa deıingi tergeý jalǵasyp jatyr», – dep qosty polısıadan.