Almatyda qasqyrdyń jynys músheleri, sonyń ishinde keptirilip, tuzdalǵan «qasqyr qunqasy» satylymǵa qoıylǵan. Satýshy ony bıznesmenderge, júrgizýshilerge jáne sátsizdikke ushyraǵan adamdarǵa arnalǵan tumar dep ataıdy. Bul týraly «Halyqstan» Telegram-arnasy habarlady, dep jazady infohub.kz saıty.
Arnanyń málimetinshe, satýshy qasqyrdyń terisi, tyrnaǵy jáne azý tisterimen qatar analyq qasqyrdyń jynys múshesin de satyp alýǵa usynady.
Satýshynyń aıtýynsha, keptirilip, tuzdalǵan bul bólik bıznesmender men júrgizýshilerge «jol ashady» jáne sátsizdikterden qorǵaıdy. Sondaı-aq satýshy bul atrıbýtty bedeýlik kezinde de qoldanýǵa bolatynyn aıtady — ol úshin ony ózimen birge alyp júrip, eshkimge kórsetpeý jetkilikti.
Sonymen qatar satýshy tek búlinbegen, tistelmegen jáne tyrnalmaǵan dananyń «jumys isteıtinin» alǵa tartady.
«Kýrsıv» basylymy mundaı saýdanyń zańdylyǵy týraly ekologıa jáne tabıǵı resýrstar mınıstrligine suraý joldady.
Vedomstvo túsindirgendeı, qasqyr Qazaqstanda sany rettelýge tıis janýarlar túrine jatady. Mundaı retteý halyqtyń densaýlyǵyn qorǵaý, qorshaǵan ortaǵa zıan keltirmeý jáne aýyl sharýashylyǵyna eleýli zıan qaýpin boldyrmaý úshin júrgiziledi.
Alaıda zań atalǵan janýarlardyń azamattar men uıymdardyń menshiginde bolýyna jol beredi.
«Zańnamada belgilengen tártippen, tıisti ruqsattar negizinde tabıǵı ortadan alynǵan qasqyrlar olardy aýlaǵan jeke nemese zańdy tulǵalardyń menshigine ótedi», — dep habarlady Ekologıa mınıstrligi.
Buǵan deıin Túrkistanda mysyq kólik róline otyryp, soqtyǵysqany habarlanǵan bolatyn.